O‘zbekiston kubogi finali oldidan o‘tkazilgan an’anaviy matbuot anjumanida “Buxoro” jamoasi bosh murabbiyi Aleksandr Xomyakov va jamoa yetakchisi Azizbek Amonov jurnalistlar savollariga javob berdi. Ularning so‘zlaridan ma’lum bo‘lishicha, jamoa g‘alaba uchun jiddiy tayyorgarlik ko‘rmoqda va finalda muxlislarini quvontirish niyatida.
“Biz finalga faqat g‘alaba niyati bilan chiqamiz. Muxlislar uchun bu o‘yin qanchalik muhim ekanini yaxshi bilamiz. Har bir futbolchi bor kuchini maydonda namoyon etishga tayyor. Biz favorit emasmiz, lekin finalda bu ahamiyatli emas — bu yerda hamma narsa mumkin”, — dedi Aleksandr Xomyakov.
Murabbiyning ta’kidlashicha, jamoa ligadagi yirik mag‘lubiyatdan xulosa chiqargan va bu safar o‘tgan xatolarni takrorlamaslikka harakat qilmoqda. “Albatta, avvalgi o‘yinda himoyada bir qator kamchiliklar bo‘lgandi, ammo ularni bartaraf etish ustida ishladik. “Paxtakor” tajribali jamoa, ularning kuchli taraflarini yopishga jiddiy e’tibor qaratdik”, — dedi u.
Shu bilan birga, murabbiy psixologik tayyorgarlikning ahamiyatini ham ta’kidladi: “Bu final nafaqat jismoniy, balki ruhiy jihatdan ham sinov bo‘ladi. Mening futbolchilarim bunday bosimga tayyor. Har bir murabbiy kabi men ham iz qoldirishni, jamoam bilan sovrin yutishni orzu qilaman.”
Jamoa yetakchisi Azizbek Amonov esa finalga chiqish ular uchun katta imkoniyat ekanini ta’kidladi. “Bu final — biz uchun birinchi, ammo biz kurashishdan chekinmaymiz. ‘Paxtakor’ katta tajribaga ega jamoa, lekin biz ham o‘z so‘zimizni aytamiz. Bor kuchimiz bilan harakat qilamiz, qolgani Allohdan”, — dedi u.
Amonov “Bunyodkor”ga qarshi o‘yindagi g‘alabani misol qilib, “o‘shanda ham jamoaviy o‘yin va birdamlik yutqazmadi, finalda ham shunday ruh bilan maydonga chiqamiz”, — deya qo‘shimcha qildi.
Shu tariqa, “Buxoro” jamoasi kubok finali oldidan faqat g‘alaba haqida o‘ylayapti. Ular uchun bu nafaqat sovrin uchun kurash, balki o‘z tarixlariga yangi sahifa yozish imkoniyati ham bo‘ladi.
“Zamin”ni Telegramʻda oʻqing!
