Mbappe: “Real Madrid — bu futbolning eng yuqori cho‘qqisi”

Kylian Mbappe “Real Madrid”dagi faoliyati haqida gapirib, “Santiago Bernabeu”dagi ilk golini eng unutilmas lahza deb atadi. “Bu gol mening Madriddagi hikoyam boshlangan daqiqa edi,” — dedi u. U raqam muhim emasligini aytdi: “Men 9 yoki 10 raqamda o‘ynashim muhim emas, asosiysi — top darvozaga kirishi.”

Mbappe Jahon chempionligini qo‘lga kiritganidan keyin o‘zgarganini aytdi. “Men futbolchi va inson sifatida ulg‘aydim. O‘zgarish — rivojlanish belgisidir,” — dedi u. U “PSG” va “Real Madrid” o‘rtasidagi farqni ham ta’kidladi: “PSG yosh klub, Real esa tarixiy jamoa. Men har ikkala jamoada o‘ynaganimdan faxrlanaman, lekin Real — futbolning cho‘qqisi.”

Mbappe jamoadoshi Arda Güler haqida ham gapirdi: “U juda iste’dodli, topni boshqarishi ajoyib. Yosh bo‘lishiga qaramay, u jasur va ishonch bilan o‘ynaydi.” U o‘z maqsadlarini ham aytdi: “Men barcha sovrinlarni yutmoqchiman — Chempionlar Ligasi va ‘Oltin top’. Har bir musobaqada g‘alaba uchun kurashaman.”

Mbappe yangi murabbiy Xabi Alonso bilan ishlash haqida ham so‘zladi. “Har bir murabbiy o‘z uslubiga ega. Xabi Alonsoning aniq g‘oyalari bor va biz uni tushunib o‘rganyapmiz. Jamoa har kuni yaxshilanib bormoqda,” — dedi Mbappe.