Toshkentning “Paxtakor” klubi kelasi mavsum Osiyo Chempionlar Ligasida ishtirok etishi aniq bo‘lganidan keyin, jamoa tarkibini jiddiy ravishda mustahkamlash ishlarini boshlab yubordi. Klub rahbariyatining asosiy e’tibori mahalliy chempionatda o‘zini ko‘rsata olgan, tajribali futbolchilarga qaratilgani ma’lum bo‘ldi.
Ishonchli manbalarga ko‘ra, Qarshining “Nasaf” jamoasi yetakchilari — himoyachi Sherzod Nasrullayev va yarim himoyachi Oybek Bozorov yaqinda jamoa bilan xayrlashadi. Ular bilan shartnomalar 2025-yil yakunida tugaydi va futbolchilar erkin agent sifatida “Paxtakor” safini to‘ldirishi kutilmoqda.
Ma’lum bo‘lishicha, Toshkent klubi har ikki futbolchi bilan muzokaralarni yakuniga yetkazgan va tomonlar o‘zaro shartlar bo‘yicha deyarli kelishuvga erishgan. Shu tariqa, “Paxtakor” yangi mavsumni ikki tajribali va sinovdan o‘tgan o‘yinchi bilan boshlashi rejalashtirilmoqda.
27 yoshli chap qanot himoyachisi Sherzod Nasrullayev — “Nasaf” tarbiyalanuvchisi bo‘lib, so‘nggi 7-yil davomida Qarshi klubi sharafini himoya qilib kelgan. U bu mavsumda Superligada 20 ta uchrashuvda maydonga tushib, 3 ta gol urdi va 2 ta golli uzatma muallifi bo‘ldi.
28 yoshli Oybek Bozorov ham “Nasaf” akademiyasi mahsuloti hisoblanadi. U 2018-yildan buyon asosiy tarkibda o‘ynab kelayotgan yarim himoyachi sifatida jamoaning asosiy yetakchilaridan biriga aylandi. Joriy mavsumda u 23 o‘yinda 4 ta gol va 11 ta assist qayd etdi — bu esa uni liganing eng samarali yarim himoyachilaridan biriga aylantirdi.
“Paxtakor” uchun ushbu ikki futbolchining qo‘shilishi kelasi mavsumda jamoaning ichki va xalqaro musobaqalardagi imkoniyatlarini oshirishi kutilmoqda. Jamoa rahbariyatining maqsadi — nafaqat Superligada zafar qozonish, balki Osiyo Chempionlar Ligasida ham munosib ishtirok etishdir.
“Zamin”ni Telegramʻda oʻqing!
