O‘zbekiston milliy jamoasi 2026 yilgi jahon chempionati yo‘lidagi tayyorgarlikni yangi bosqichga olib chiqmoqda. O‘zbekiston futbol assotsiatsiyasi ma’lum qilishicha, jamoa futbolchilari uchun to‘g‘ri ovqatlanish va jismoniy tiklanish jarayonlarini samarali yo‘lga qo‘yish maqsadida ispaniyalik bosh oshpaz hamda professional nutritsiolog jalb etildi.
Bu yangicha yondashuv futbolchilarning sog‘lom turmush tarzini shakllantirish, ularning energiya balansini aniq nazorat qilish va har bir uchrashuvda yuqori jismoniy tayyorgarlikni saqlashga xizmat qiladi. Ta’kidlanishicha, jamoa shtabi mazkur qadam orqali futbolchilarning ovqatlanish tartibi va tiklanish jarayonlarini ilmiy asosda boshqarishni maqsad qilgan.
O‘zbekiston terma jamoasi murabbiylar shtabi fikricha, to‘g‘ri tanlangan ratsion va sport nutritsiyasi nafaqat jismoniy holat, balki psixologik barqarorlik uchun ham katta ahamiyatga ega. Ispaniyalik mutaxassislar har bir futbolchi organizmining individual ehtiyojlarini tahlil qilib, ularga moslashtirilgan menyu va diyeta dasturini joriy etadi.
Milliy jamoa noyabr oyida BAAning Dubay shahrida bo‘lib o‘tadigan xalqaro «Al Ayn kubogi» turnirida ishtirok etadi. Musobaqada O‘zbekiston bilan bir qatorda jahon chempionatida qatnashgan Eron, Misr va Kabo-Verde terma jamoalari ham maydonga tushadi.
Birinchi bahsda o‘zbekistonliklar Misr jamoasiga qarshi to‘p surishadi. Barcha uchrashuvlar «Hazza bin Zayid» stadionida o‘tkaziladi. Bu bellashuvlar orqali jamoa nafaqat sport jihatdan, balki funksional jihatdan ham jahon chempionati sari muhim tajriba to‘plashi kutilyapti.
O‘FA mutasaddilarining ta’kidlashicha, futbolchilarning sog‘lom ovqatlanishi, tiklanish va jismoniy barqarorlik ustuvor vazifaga aylangan — bu esa kelgusi muvaffaqiyatlar uchun asos bo‘ladi.
“Zamin”ni Telegramʻda oʻqing!
