2026 yilgi jahon chempionatiga puxta tayyorgarlik ko‘rayotgan O‘zbekiston milliy terma jamoasi noyabr oyidagi xalqaro tanaffusdan unumli foydalanmoqda. Bu safar Fabio Kannavaro boshchiligidagi jamoa Birlashgan Arab Amirliklarida o‘tkaziladigan nufuzli Xalqaro Al-Ayn kubogida ishtirok etib, o‘zini jahon chempionatiga tayyorlashda navbatdagi jiddiy qadamni qo‘yadi.
14–17-noyabr kunlariga belgilangan ushbu musobaqada Misr, Eron va Kabo-Verde kabi mundialga yo‘llanma olgan termalar ham maydonga tushadi. Demak, raqobat darajasiga shubha yo‘q — har bir o‘yin kuchlilar sinovi sifatida o‘tadi.
O‘zbekiston birinchi yig‘indayoq Misrga qarshi o‘yin bilan start oladi. Bu bahs oldidan soccer365 sayti o‘zbekistonlik muxlislar uchun e’tiborli bir qator qiziqarli ma’lumotlarni to‘plab taqdim etdi. Bizning jamoa qanday holatda? Misr terma jamoasida vaziyat qanday? Keling, har jihatni batafsil ko‘rib chiqamiz.
O‘zbekiston 2025 yilda bir martagina mag‘lub bo‘ldi
Terma jamoaning tarixiy yo‘lini Timur Kapadze boshlab bergan edi — aynan u O‘zbekistonni ilk bor jahon chempionatiga olib chiqqan mutaxassis bo‘ldi. Biroq bir oy muqaddam lavozimlarda rotatsiya bo‘ldi: Fabio Kannavaro bosh murabbiy etib tayinlandi, Kapadze esa uning yordamchisiga aylandi.
Oktyabrdagi o‘rtoqlik uchrashuvlarida O‘zbekiston Kuvaytni 2:0 hisobida yengdi va Urugvayga qarshi keskin bahsda 1:2 hisobida mag‘lub bo‘ldi. Murabbiylar shtabidagi o‘zgarishlar shundan so‘ng davom etdi. Kannavaroning adaptatsiya jarayonida faol yordam ko‘rsatgan Kapadze keyinchalik jamoani tark etib, mustaqil faoliyat boshlashga qaror qildi.
Kannavaro esa o‘z navbatida italiyalik mutaxassis Karlo Alberto Bertoneni shtabga qo‘shdi — u «Bunyodkor»da ishlagan davrida mahalliy futbolni yaxshi o‘rganib chiqqan edi.
Husanov maydonga qaytdi, Shomurodov esa yuqori formada
Tarkibda katta o‘zgarishlar bo‘lmadi. Eng katta yangilik — Abduqodir Husanovning safga qayta qo‘shilishi. U bir necha oy jarohat bilan ovora bo‘lgan, ammo o‘ziga kelib, hatto «Manchester Siti» bilan kubok uchrashuvida to‘p tepib ulgurdi. Hozirda u terma jamoa bilan to‘liq mashg‘ulot o‘tkazmoqda.
Eldor Shomurodov esa o‘zining oxirgi yillardagi eng samarali mavsumini o‘tkazmoqda. «Istanbul Bashakshehir» safidagi 18 o‘yinda 8 ta gol urib, ayniqsa, so‘nggi bahslarda ajoyib formaga kirgan. Kuvaytga qarshi g‘alaba to‘pini aynan u urgani hali ham eslanib turibdi.
O‘zbekiston katta o‘yinlarda ko‘pdan beri ishonchli
2024 yilgi Osiyo kubogida Avstraliya bilan durang (1:1), Qatarga qarshi esa faqat penaltilarda yutqazilgan bahs — jamoa o‘zini top-raqiblarga qarshi ham munosib ko‘rsata olishini isbotlagan edi.
Saralash bosqichida Eronga qarshi ikki o‘yinda ham mag‘lub bo‘linmadi (0:0 va 2:2), Qatar esa yirik 3:0 hisobida orqaga surildi. 2025 yilgi CAFA Nations Cup finalida ham Eron 1:0 hisobida taslim etilgan.
Yil davomidagi yagona mag‘lubiyat — Kannavaro qo‘li ostidagi Urugvayga qarshi keskin o‘yinda (1:2) kuzatilgan.
Misr — saralash bosqichining eng «mustahkam devori»
Misr terma jamoasi mundial saralashlarini deyarli ideal darajada o‘tkazdi: 10 o‘yinda 8 g‘alaba va 2 durang. Eng qizig‘i — 2025-yil davomida ular birorta o‘yinda darvozasiga to‘p kiritdirmagan.
Shuningdek, Tunisga qarshi ikki o‘rtoqlik uchrashuvida (1:0, 3:0) ham g‘olib chiqishdi.
Eng so‘nggi rasmiy o‘yin 12-oktyabrda o‘tkazilgan. Endi ularning keyingi qadami — Al-Ayn kubogida O‘zbekistonga qarshi bahs.
Misrda murabbiy qarori muhokama markazida
Xusam Hasan katta sensatsiya qilgani yo‘q. Biroq «Al-Ahli» va «Zamalek» futbolchilarining termaga chaqirilmagani jamoa atrofida katta muhokamalar keltirib chiqardi. Yassir Ibrohim, Ahmad Kuka va boshqalar vaziyatdan norozi bo‘ldi. Baribir, klublar rahbariyati bu qarorni ma’qullamoqda.
Eng yoqimli xabar esa — “Liverpul” yulduzi Muhammad Salohning terma jamoaga qo‘shilgani. U so‘nggi uchta klub o‘yinida uchta gol urgan holda juda yaxshi kayfiyat bilan yig‘inga yetib keldi.
Misr himoya muammolarini bartaraf qildi
2024 yilgi Afrika Millatlar Kubogi Misr uchun muvaffaqiyatsiz o‘tgandi: 4 o‘yinda biror bor «quruq» o‘yin o‘tkazolmadi va jami 7 ta gol qabul qilgan. Shundan so‘ng murabbiy xatolar ustida jiddiy ishladi. Natija esa — jahon chempionati saralashining eng samarali himoyasi: 10 turda atigi 2 ta gol o‘tkazilgan.
Shu sabab bahs oldidan prognozlar ehtiyotkor: mutaxassislar 1:1 hisobidagi durang variantini real deb hisoblayapti.
Xulosa
Al-Ayn kubogi nafaqat o‘rtoqlik turnir, balki jahon chempionati oldidan haqiqiy sinov. O‘zbekistonning yangilangan tarkibi, Kannavaroning yangi uslubi, Shomurodovning formasi va Husanovning qaytishi — barchasi katta umid beradi.
Misr esa o‘z navbatida juda tartibli, himoyasi mustahkam va Saloh boshchiligida yuqori formada.
Demak, bizning oldimizda — juda qiziqarli va prinsipial to‘qnashuv turibdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
