Yevropa futboli atrofida yana bir jiddiy bahs-munozara avj oldi. Bir qator taniqli futbolchilar — jumladan, «Monako» yarimhimoyachisi Pol Pogba va «Chelsi»ning sobiq yulduzi Hakim Ziyosh — UYEFAga rasman murojaat qilib, Isroil futbol assotsiatsiyasini musobaqalardan chetlatish masalasini ko‘rib chiqishni talab qilmoqda. Bu haqda Al Jazeera nashri orqali ma’lum qilindi.
Manbalarga ko‘ra, murojaatnomaga 70 dan ziyod professional futbolchi imzo chekkan. Ular UYEFAdan Isroil bilan har qanday rasmiy hamkorlikni to‘xtatishni talab qilmoqda. Sportchilar fikricha, bunday qadam Falastin xalqiga nisbatan sodir bo‘layotgan adolatsizlik va huquqbuzarliklarga munosabat sifatida qabul qilinishi kerak.
Futbolchilarning ta’kidlashicha, jahon hamjamiyati sport sohasida ham tinchlik va insoniylik prinsiplarini himoya qilishi lozim. Ular “sport va adolat bir-biridan ajralmas” degan fikrni ilgari surgan.
Isroil milliy terma jamoasi esa ayni paytda Jahon chempionati saralash bosqichida ishtirok etmoqda. Jamoa 9 ochko to‘plab, guruhda 3-o‘rinni egallab turibdi. Navbatdagi uchrashuv 13-noyabr kuni Litva terma jamoasiga qarshi bo‘lishi rejalashtirilgan.
Futbol jamoatchiligi bu masala atrofida o‘ziga xos ikkiga bo‘lingan: ayrimlar sportni siyosatdan ayro holda saqlash zarurligini aytsa, boshqalar sport ham global adolat uchun maydon bo‘lishi kerak, deb hisoblaydi.
Umuman olganda, Pogba, Ziyosh va boshqa futbolchilarning chaqirig‘i UYEFAda jiddiy muhokama uyg‘otishi kutilmoqda. Qanday qaror qabul qilinishi esa yaqin vaqtlarda ma’lum bo‘ladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
