O‘zbekiston U-17 terma jamoasi Xorvatiya ustidan qo‘lga kiritilgan o‘ta qiyin va tarixiy g‘alabadan so‘ng bosh murabbiy Islombek Ismoilov samimiy, ochiq va hazilga boy tarzda intervyu berdi. Murabbiy o‘z shogirdlari, jamoa ruhiyati va bo‘lajak raqib haqida muhim fikrlar bildirdi.
Uning ta’kidlashicha, penaltilar seriyasida barcha qarorlar futbolchilarning o‘zi bilan maslahatlashgan holda qabul qilingan.
«Biz bolalardan ruhan kim tayyorligini so‘radik. Har biri navbatini o‘zi tanladi. Bu o‘ziga ishonch belgisi, ularda xarakter bor,» — dedi murabbiy.
Biroq jamoa uchun katta xabardorlik — Muhammad Hakimov keyingi o‘yinda maydonga tusha olmaydi. Ismoilov buni jiddiy yo‘qotish sifatida baholadi:
«Muhammadning o‘ynolmasligi albatta zarba. Lekin uning o‘rnida Amirxon Murodovga ham ishonchimiz katta. U o‘zining eng kuchli o‘yinini ko‘rsatishiga umid qilamiz.»
«Biz oson g‘alaba qozonmaymiz — doim bosim ostidamiz»
Ismoilov Xorvatiyaga qarshi o‘yin oldidan jamoa faqat taktika emas, ruhiyat borasida ham jiddiy tayyorgarlik ko‘rganini ta’kidladi.
«Bu turda har qanday raqibni yutish mumkin — ruhiyat birinchi o‘rinda turadi. Xorvatiya Yevropaning eng baquvvat jamoalaridan biri, jismoniy jihatdan juda kuchli. Shuning uchun og‘ir o‘yin kutgandik. Lekin futbolchilarimiz imkoniyatdan maksimal foydalandi.»
U Argentina misolini keltirib, bu bosqichda prognozlar umuman ishlamasligini qo‘shimcha qildi.
Darvozabonlar almashinuvi — rejali qaror
Penaltilar oldidan darvozabon Ne’matulloh Rustamjonovning tushirilishi ko‘pni qiziqtirgan savol edi. Murabbiy buni tezkor, ammo asosli qaror sifatida izohladi:
«Bizda ikki nafari ham teng kuchli. Darvozabonlar murabbiyi vaziyatni baholab, o‘z fikrini bildirdi. Bu Ibrohim Shokirov turolmaydi degani emas. Barcha qaror jamoaviy maslahat bilan qabul qilindi.»
Italiya — jiddiy raqib, tahlil allaqachon boshlangan
Ismoilov bo‘lajak raqib Italiya haqida ham fikr bildirdi. Uning so‘zlariga ko‘ra, shtab jamoa o‘yinlarini avvaldan o‘rganib bo‘lgan:
«Yordamchilarimni allaqachon Italiya — Chexiya o‘yiniga jo‘natdim. Batafsil tahlil qilib chiqdik. Ular bilan o‘yin taktik va psixologik nuqtayi nazaridan talabchan bo‘ladi.»
«Bir mehmonxonada yashayapmiz… ko‘zimiz tushsa — salom aytamiz»
Intervyu davomida murabbiy mehmonxona masalasida kulimsirab javob berdi:
«Italiya bilan bir mehmonxonadamiz. Saudiya Arabistoni bilan ham bir oyda bitta mehmonxonada yashagandik. Har kuni yonma-yon ovqatlanamiz. Mehmonxona alohida sahna emas — o‘yin maydonida gap ko‘p.»
Umuman, Islombek Ismoilovning suhbatidan jamoada ishonch, birdamlik va musobaqaga jiddiy yondashuv hukm surilayotgani yaqqol seziladi. Endilikda diqqat markazi — 18-noyabr kuni bo‘lib o‘tadigan O‘zbekiston — Italiya nimchorak finali. Muxlislar uchun bu o‘yin nafaqat imtihon, balki yangi avlod futbolchilarining qanchalik baquvvat ekanini ko‘rish uchun tarixiy imkoniyat bo‘ladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
