“Real Madrid” yozgi transfer oynasi yaqinlashar ekan, jamoa ichida jiddiy o‘zgarishlar muhokama qilinmoqda. Madrid klubi rahbariyati bir necha mavsumdan buyon asosiy tarkibda o‘ynab kelayotgan ikki tajribali himoyachi — Antonio Ryudiger va David Alaba bilan xayrlashishni rejalashtirayotgani aytilmoqda.
Ispaniyaning mashhur “AS” nashri yozishicha, klub rahbariyatini ikki futbolchining bir-biriga o‘xshash muammosi — tez-tez jarohat olishi jiddiy bezovta qilmoqda. Ularning sog‘lig‘i bilan bog‘liq muammolar jamoaning o‘yin tizimiga, ayniqsa, muhim bahslarda katta ta’sir ko‘rsatgan. Shu bois, rahbariyat yangi mavsumga to‘liq sog‘lom va barqaror himoya chizig‘i bilan kirishni maqsad qilgan.
Yana bir muhim jihat — Ryudiger hamda Alabaning shartnomalari kelasi yozda yakunlanadi. Bu esa “qirollik klubi”ga ularni erkin agent sifatida yo‘qotmasdan, hisobga tushum olib qolish imkonini beradi. Aynan shunga ko‘ra, klub ularni qishki yoki yozgi transferda sotish masalasini jiddiy ko‘rib chiqmoqda.
David Alaba 2021-yildan buyon Madrid sharafini himoya qilib kelmoqda va ushbu davr mobaynida muhim g‘alabalarda o‘z hissasini qo‘shgan. Antonio Ryudiger esa 2022-yilda jamoaga qo‘shilib, mentaliteti va jismoniy kuchi bilan muxlislar mehrini qozongan. Biroq jarohatlar ularning o‘yinini siljitib, yuqori barqarorlikdan uzoqlashtirdi.
Ayni vaqtda Xabi Alonso boshqarayotgan jamoa La Ligada 12-turdan so‘ng 31 ochko bilan yetakchilik qilmoqda. Madrid klubi musobaqada kuchli ritm saqlayotgan bo‘lsa-da, himoya chizig‘idagi muammolarni yozgi mavsumda tubdan hal qilish niyatida.
“Real Madrid”ning oldindan rejalashtirilayotgan qayta qurish jarayoni muxlislar orasida qizg‘in muhokamaga sabab bo‘lmoqda. Yangi mavsumda jamoa himoyasi qanday ko‘rinish olishi — bu savol hozirdan intriga yaratayotgani turgan gap.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
