Elit OChLning hal qiluvchi 5-tur uchrashuvi arafasida «Nasaf» klubi bosh murabbiyi Ro‘ziqul Berdiyev va tajribali darvozabon Abduvohid Ne’matov matbuot anjumani o‘tkazdi. Mutaxassis jamoadagi murakkab ruhiy holat haqida ochiq gapirdi va muxlislarga g‘alaba va’da qildi.
Berdiyev: "Saviya yuqori, qiyin to‘qnashuv kutmoqda"
Ro‘ziqul Berdiyev dastlab musobaqaning umumiy saviyasi haqida to‘xtaldi: "Shuni alohida ta’kidlamoqchimanki, Elit OChLda barcha raqiblarning darajasi yuqori. Ertaga bizni yana bir qiyin to‘qnashuv kutib turibdi. O‘ylaymanki, yigitlarni o‘yinga yaxshi tayyorlay oldik va ijobiy natija (uch ochko) qayd etishga harakat qilamiz".
Darvozabon Ne’matov ham o‘z navbatida jamoaning ishonchini bildirdi: "Yaxshi jamoaga qarshi o‘ynaymiz. Nasib qilsa, muxlislarimizni xursand qilamiz va uch ochkoni qo‘lga kiritamiz".
«Traktor»ning kuchi — kollektiv o‘yin
«Traktor»ning qolgan raqiblardan farqi haqidagi savolga javob berarkan, murabbiy eronliklarning jamoaviy ruhiyati yuqoriligini ta’kidladi: «Traktor»da nomdor o‘yinchilar (yulduz futbolchilar) soni ozroq bo‘lishi mumkin, ammo ular jamoa sifatida juda kuchli. Ular individual mahoratga emas, kollektiv o‘yinga ko‘proq urg‘u beradigan raqib.
Murabbiy: "Qiyinchiliklarga o‘zimiz aybdormiz"
«Nasaf»ning ruhiy holati va jarohatlar haqidagi eng keskin savolga Berdiyev juda ochiq-oydin javob berdi:
«Hozir biz mushkul bosqichni o‘tkazyapmiz. Jismoniy va ma’naviy qiyinchiliklarga duch kelyapmiz, ammo bunga o‘zimiz aybdormiz. Yigitlarga ham buni tushuntirdim. Muxlislar oldida yuzimiz yorug‘ bo‘lishi uchun, g‘alaba qozonishga intilamiz. Ba’zi bir futbolchilarimizda yengil jarohatlar bor, lekin ertaga har bir futbolchi maydonda maksimal harakat qiladi degan umiddaman. Ushbu musobaqada hali imkoniyatlarimiz saqlanib qolgan».
Darvozabon Abduvohid Ne’matov xavfni bir kishidan kutmasligini, har bir raqibga e’tiborli bo‘lishini bildirdi. Undan yuqori darajadagi o‘yin kutish mumkinmi, degan savolga esa: «Nasib qilsa, albatta», deya va’da berdi.
Eslatib o‘tamiz, «Nasaf»ning «Traktor»ga qarshi hal qiluvchi uchrashuvi ertaga 18:45 da boshlanadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
