Superligadagi jarayonlar tinchimaydi: mavsum yakunlanganiga qaramay, jamoalar allaqachon kelasi yil uchun tarkibni shakllantirishga kirishgan. Transfer oynasi rasman ochilmagan bo‘lsa-da, klublar o‘z peshqadam o‘yinchilarini saqlab qolishga jiddiy e’tibor qaratyapti.
Shu maqsadda Toshkentning “Bunyodkor” jamoasi ham o‘zining ikki muhim futbolchisi — 22 yoshli chernogoriyalik hujumchi Matiya Krivokapich va ishonchli himoyachi Najmiddin Normurodov bilan shartnomani uzaytirdi. Bu qaror klubning kelasi mavsumda ham raqobatbardosh tarkib bilan maydonga tushish niyatidan dalolat beradi.
Krivokapich ikkinchi davradan jamoaga qo‘shilgan bo‘lsa-da, juda tez moslashib, muhim o‘yinlarda o‘zini ko‘rsatishga ulgurdi. U Superligada 10 ta uchrashuvda ishtirok etib, 3 ta gol urdi va yana 2 ta golli uzatma berdi. Chernogoriyalik forvardning harakatlaridagi tezkorlik va gol sezgirligi “qaldirg‘ochlar” hujumida muhim quvvat bo‘lib xizmat qildi.
Najmiddin Normurodov esa mavsum davomida jamoa himoyasida asosiy figura bo‘ldi. U 29 ta o‘yinda maydonga tushib, 2 ta gol va 2 ta assist qayd etdi. Universal himoyachi sifatida Normurodovning barqaror o‘yini va intizomi jamoa muvaffaqiyatida katta rol o‘ynadi.
“Bunyodkor” boshqaruvi ushbu ikki futbolchi bilan shartnoma uzaytirish orqali o‘z o‘zagini saqlab qoldi va yangi mavsumga tayyorgarlikning dastlabki muhim qadamlaridan birini qo‘ydi.
Muxlislar esa endi klubdan yangi transferlar, qiziqarli xabarlar va yanada kuchli “qaldirg‘ochlar”ni kutishmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
