AQSHda o‘tkazilgan Jahon chempionati–2026 qur’asi butun dunyo futbolidagi eng katta voqeliklardan biri sifatida namoyon bo‘ldi. Millionlab muxlislar kutgan marosimda O‘zbekiston milliy terma jamoasining ham qaysi guruhda tushishi ma’lum bo‘ldi. Qur’a natijasiga ko‘ra, yurtdoshlarimiz K guruhidan joy oldi va bu kvartetdagi raqobat o‘ta keskin va qizg‘in kechishi kutilmoqda.
Terma jamoamizning guruh bosqichidagi rasmiy taqvimi ham e’lon qilindi. Mazkur uchrashuvlar O‘zbekiston uchun tarixiy ahamiyat kasb etadi — chunki bu mamlakatimiz tarixidagi ilk Jahon chempionati ishtirokidir. Har bir to‘qnashuv nafaqat ochko, balki ruhiy kuch, tajriba va yangi tarix sari qadam bo‘ladi.
1-tur — 17-iyun | O‘zbekiston – Kolumbiya
Dastlabki bahsda terma jamoamiz Janubiy Amerika futboliga xos jonkuyar, texnik jihatdan kuchli Kolumbiyaga qarshi maydonga tushadi. Bu o‘yin guruhdagi umumiy tusni belgilab berishi mumkin, shu bois jamoadan maksimal jamlanish va iroda talab etiladi.
2-tur — 23-iyun | Portugaliya – O‘zbekiston
Ikkinchi uchrashuvda yirik favoritlardan biri — Portugaliyaga qarshi maydonga chiqiladi. Yevropa grandlaridan biriga qarshi bellashuv nafaqat sinov, balki o‘zimizni namoyon qilish uchun katta imkoniyat bo‘ladi. Muxlislar bu kunni allaqachon taqvimda belgilab qo‘yishganiga shubha yo‘q.
3-tur — 27-iyun | Kongo DR / Yamayka / Yangi Kaledoniya – O‘zbekiston
Guruh bosqichining so‘nggi bahsi pley-off taqdirini hal qiluvchi o‘yin bo‘lishi ehtimoldan xoli emas. Bu raqib pley-off saralashidan keladi va uning qaysi jamoa bo‘lishidan qat’i nazar, raqobat yuqori bo‘lishi tayin. Terma jamoamiz uchun bu o‘yinda har bir gol, har bir daqiqa beqiyos ahamiyat kasb etadi.
JCH–2026 uchun taqdim etilgan ushbu taqvimdan ko‘rinib turibdiki, O‘zbekiston terma jamoasi oldida katta mas’uliyat va bir vaqtning o‘zida ulkan imkoniyatlar turibdi. Muxlislar esa allaqachon jamoa atrofida birlashib, ularga ishonch va dildan qo‘llab-quvvatlashni boshlab yuborishdi.
Mundialga qadam qo‘ygan yurtdoshlarimizga omad va shijoat tilaymiz!
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
