Portugaliya terma jamoasi bosh murabbiyi Roberto Martines Jahon chempionati–2026 qur’asi yakunlangach, o‘z fikrlarini baham ko‘rdi. Uning ta’kidlashicha, qur’a natijalari endi tayyorgarlik rejalarini aniq belgilash imkonini berdi va jamoa shu asosda ish boshlaydi.
Ma’lumki, portugallar “K” guruhida Kolumbiya, O‘zbekiston va pley-off orqali keladigan jamoadan biriga qarshi maydonga tushadi. Martines guruh tarkibini munosib va muvozanatli deb baholadi.
“Endi qur’a bizga qaysi yo‘nalishda harakat qilish kerakligini ochiq ko‘rsatdi. Birinchi bahsni 17-iyunda o‘tkazishimiz juda muhim — bu tayyorgarlik jarayonini yanada aniq va rejali qiladi. Ilk o‘yin — pley-off g‘olibi bilan. Hozircha raqibning nomi noma’lum, ammo biz har qanday variantga tayyorlanamiz”, — dedi Martines.
Mutaxassis Kolumbiya va O‘zbekiston haqida ham ehtirom bilan to‘xtalib o‘tdi. Uning ta’kidlashicha, har ikki jamoa Mundial yo‘lida jiddiy tayyorgarlik ko‘rgan, qat’iyatli va raqobatbardosh termalar hisoblanadi.
“Kolumbiya ham, O‘zbekiston ham e’tibor talab qiladigan raqiblar. Ularning rivojlanish dinamikasi yuqori, musobaqaga jiddiy tayyorgarlik qilgan. Biz ularni hurmat qilamiz va kuchli raqib sifatida qabul qilamiz”, — deya qo‘shimcha qildi portugallar ustozi.
2026 yilgi Jahon chempionati oldidan qizg‘in muhit tobora ortmoqda. Martines so‘zlariga ko‘ra, Portugaliya jamoasi o‘z oldiga yuqori maqsadlar qo‘ygan va qur’a natijalari bu maqsadlarga yetishishda yo‘l xaritasini belgilab bermoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
