Jahon chempionati–2026 qur’asi yakunlangach, Kolumbiya terma jamoasining bosh murabbiyi Nestor Lorenso o‘z jamoasiga bo‘lgan ishonchini yana bir bor tasdiqladi. Uning ta’kidlashicha, Kolumbiya so‘nggi yilda mustahkam tarkib sifatida shakllanib, saralashda olingan natijalar ham bunga oynadagidek dalolat bermoqda.
Ma’lumki, kolumbiyaliklar “K” guruhida Portugaliya, O‘zbekiston va pley-off orqali keladigan raqib bilan kuch sinashadi. Murabbiyning fikricha, guruh oson sanalmaydi, ammo Kolumbiya bunday chaqiriqlardan qo‘rqmaydi.
“Yilning avvalida Braziliyaga qarshi ikki o‘yinni yutqazdik, ammo keyingi bosqichda jamoa xarakter ko‘rsatdi: besh bor zafar, to‘rt marta durang — bu jamoa uchun sezilarli o‘sish belgisi. Umid qilamanki, bunday rivojlanish musobaqa yaqinlashgan sari yanada jadallashadi”, — dedi Lorenso.
Uning so‘zlariga ko‘ra, Mundialgacha tayyorgarlik uchun uncha ko‘p vaqt yo‘q. Kolumbiya terma jamoasi musobaqa boshlanishidan oldin 20 kunlik maxsus yig‘in o‘tkazadi. Bu davr futbolchilarning jismoniy holatini optimal darajaga olib chiqishda hal qiluvchi omil bo‘lishi kutilmoqda.
“Qisqa vaqt ichida jamoaning shaklini topishimiz, futbolchilarni eng yaxshi holatda Mundialga olib kelishimiz shart. Qaysi shaharda o‘ynashimizdan qat’i nazar, tashkiliy masalalarni to‘liq hal qilamiz. Bizning maqsad — guruhdan munosib o‘yinlar bilan chiqish”, — deya qo‘shimcha qildi murabbiy.
Kolumbiya uchun K guruhi jiddiy sinov bo‘lishi mumkin, ammo Lorensoning o‘ziga ishonchi va jamoaga bo‘lgan talabchan yondashuvi muxlislarda ham katta umid uyg‘otmoqda. Terma jamoa keyingi bosqichga chiqish uchun bor kuchini ishga solishi, raqobatni yanada kuchaytirishi tayin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
