Arab kubogida guruh bosqichining hal qiluvchi — 3-tur uchrashuvlari qizg‘in tarzda o‘tmoqda. V guruhidagi ikki muhim bellashuv musobaqaning keyingi bosqichiga yo‘l oluvchilarni aniqlab berdi va muxlislarga dramatik onlarga boy kecha taqdim etdi.
Marokash terma jamoasi Saudiya Arabistoniga qarshi o‘ta mas’uliyatli o‘yinda minimal hisobda ustun keldi. Uchinchi daqiqadanoq hujumkor o‘yin ko‘rsatgan marokashliklar 11-daqiqada Al Berkauining aniq zarbasi orqali hisobni ochishdi. Qolgan daqiqalarda Saudiya bir necha xavfli hujumlar tashkil etdi, ammo muvaffaqiyat qozona olmadi. Umuman olganda, Saudiya 69-daqiqada penalti imkoniyatini ham qo‘ldan boy berdi — Al Hamdan zarbasini marokash darvozaboni qoyadek qaytardi.
Shu tariqa Marokash 7 ochko bilan V guruhining peshqadami sifatida chorak finalga yo‘l oldi, Saudiya esa 6 ochko bilan ikkinchi o‘rinni egallab, navbatdagi bosqichga yo‘llanmani qo‘lga kiritdi.
В guruhi. 3-tur.
Marokash — Saudiya Arabistoni 1:0
Gol: Al Berkaui (11).
Foydalanilmagan penalti: Al Hamdan (69, Saudiya).
Guruhdagi ikkinchi uchrashuv — O‘mon va Qamar orollari o‘rtasidagi bellashuv ham o‘z dramatizmi bilan ajralib turdi. O‘monliklar As Sabhining 30 va 43-daqiqalardagi ikki goli hisobiga kuchli start olishdi. Biroq Qamar orollari 68-daqiqada Hamid-u tomonidan bitta gol urib, o‘yinga intriga qaytardi. Shunga qaramay, bu natija O‘monga yetarli bo‘lmadi — ular 4 ochko bilan 3-o‘rinda qolib, musobaqani tark etdi.
В guruhi. 3-tur.
O‘mon — Qamar orollari 2:1
Gollar: As Sabhi (30, 43) — Hamid-u (68).
Natijada 1/4 finalning dastlabki juftliklari aniq bo‘ldi. 11 dekabr kuni Marokash A guruhida ikkinchi bo‘lgan Suriyaga qarshi maydonga tushadi. Saudiya esa o‘sha guruh yetakchisi — Falastinga qarshi jiddiy sinovdan o‘tadi.
Arab kubogi Qatarda qizg‘in tus olmoqda va muxlislar yanada dahshatli kurashlarga guvoh bo‘lishi shubhasiz.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
