Bundesliganing 14-turidan o‘rin olgan navbatdagi qiziqarli bahs «Alyans Arena»da bo‘lib o‘tdi. Vensan Kompani boshchiligidagi «Bavariya» o‘z maydonida autsayder hisoblangan «Mayns 05»ni qabul qildi, ammo kutilganidek oson g‘alabaga erisha olmadi. Uchrashuv 2:2 hisobida durang bilan yakunlandi.
Bellashuvning 29-daqiqasida yosh futbolchi Karl hisobni ochib, myunxenlik muxlislarni quvontirdi. Biroq birinchi taym oxirida «Bavariya» himoyasidagi e’tiborsizlik o‘z so‘zini aytdi. 45+2-daqiqada Katsper Potulskiy hisobni tenglashtirdi va mehmonlarga umid bag‘ishladi.
Ikkinchi bo‘lim boshlangach, «Mayns» yana bir bor hujumda omadli harakat qildi. 67-daqiqada Li Je Son aniq zarba bilan kambekni davom ettirib, hisobni 2:1 ko‘rinishiga keltirdi. Shu onlarda «Bavariya» mag‘lubiyat xavfi ostida qoldi.
Uchrashuv yakuniga yaqin Xarri Keyn jamoasini qutqarib qoldi. 87-daqiqada ingliz to‘purar 11 metrlik jarima zarbasini aniq amalga oshirib, hisobni tenglashtirdi — 2:2. Bu gol myunxenliklarga muhim bir ochkoni olib qolish imkonini berdi.
Bavariya — Mayns 2:2
14 dekabr, «Alyans Arena»
Gollar: Karl (29), Keyn (87, penalti) — Potulski (45+2), Li (67).
Bavariya — Noyer, Stanishich, Ito (Devis, 61), Kim (Jekson, 73), Bishof (Laymer, 61), Kimmix, Goretska (Pavlovich, 61), Olise, Karl, Gnabri, Keyn.
Mayns — Bas, Meloni, Bell, Potulski, Da Kosta, Kavasaki (Norden, 62), Sano, Li Chje Son, Veratsshnig, Hollerbax (Vayper, 78), Boving.
Ogohlantirishlar: Da Kosta (50), Laymer (77), Devis (83), Potulski (85).
Shu tariqa, mag‘lubiyat nimaligini bilmayotgan «Bavariya» joriy turdan so‘ng 38 ochko bilan turnir jadvalida peshqadamlikni saqlab qoldi va 2-o‘rindagi «Leypsig»ni 9 ochkoga ortda qoldirmoqda. «Mayns» esa 8 ochko bilan jadvalning eng quyi pog‘onasida qolmoqda.
Qisqasi, «Bavariya» g‘alabalar seriyasini davom ettira olmadi, ammo Xarri Keynning sovuqqonligi jamoani kutilmagan mag‘lubiyatdan asrab qoldi. Bundesligada esa kurash tobora qizib bormoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
