Italiyalik mashhur murabbiy Fabio Kannavaro nega kutilmagan qaror qabul qilib, O‘zbekiston terma jamoasi bilan ishlashni tanlagani haqida ochiq va samimiy fikrlarini bildirdi. Uning aytishicha, bu qaror tasodif emas, balki puxta o‘ylangan va kelajakka qaratilgan qadam bo‘lgan.
— Nima uchun aynan O‘zbekiston taklifini qabul qildim? Chunki bu jamoa jahon chempionatiga yo‘l olgan. Bu nafaqat men, balki futbolchilar uchun ham ulkan tarixiy imkoniyat. Biz uchun bu ilk tajriba bo‘ladi va, shubhasiz, juda katta va unutilmas turnirga aylanadi, — dedi Kannavaro.
Mutaxassis “biz” degan so‘zni alohida urg‘u bilan tilga oldi. Uning ta’kidlashicha, mundial shogirdlari uchun haqiqiy tajriba maktabi bo‘ladi. Bu musobaqa yosh futbolchilarni katta bosqichga olib chiqadi, ularni ruhan va taktik jihatdan chiniqtiradi.
Kannavaro yashirmadi: u aslida Italiyada ishlashni rejalashtirgan, vatanidagi takliflarni kutib yurgan. Biroq vaqt o‘tishi bilan faqat kutuv bilan cheklanib qolish insonni charchatishini anglagan.
— Agar imkoniyat tug‘ilmasa, inson o‘z chegaralarini kengaytirishi, yangi muhitda o‘zini sinab ko‘rishi kerak. Men uchun O‘zbekiston aynan shunday yangi sahifa bo‘ldi, — deya qo‘shimcha qildi u.
52 yoshli murabbiy uchun bu qaror faqat ish joyini almashtirish emas, balki yangi futbol madaniyati, yangi chaqiriq va katta maqsadlar sari tashlangan qat’iy qadamdir. Kannavaro va O‘zbekiston milliy terma jamoasi oldida esa endi jahon arenasida o‘z so‘zini aytishdek ulkan vazifa turibdi.
Mehmon guruhidagi foydalanuvchilar ushbu nashrga izoh qoldira olmaydi.
