Elit Osiyo Chempionlar ligasining 6-turi doirasida bo‘lib o‘tadigan Al Ittihod – Nasaf bellashuvi o‘tkaziladigan maydon o‘zgartirildi. Bu haqda Saudiya Arabistoni klubi rasmiy bayonot bilan ma’lum qildi.
Dastlab Jidda shahridagi shahzoda Abdulloh al-Faysal stadionida o‘tkazilishi rejalashtirilgan bahs endilikda shu shaharda joylashgan zamonaviy «Qirol Abdulloh Al-Inmaa» stadionida bo‘lib o‘tadi. Qaror tashkiliy sabablarga ko‘ra qabul qilingani ta’kidlanmoqda.
Guruh bosqichi doirasidagi ushbu uchrashuv 23 dekabr kuni Toshkent vaqti bilan soat 23:15 da start oladi. Saudiyaliklar o‘z uyida muhim ochkolar uchun kurash olib borishni rejalashtirgan.
Ayni paytda «Al Ittihod» Elit Osiyo Chempionlar ligasi jadvalida 6 ochko jamg‘argan holda 8-o‘rinni egallab turibdi. «Nasaf» esa hozircha ochko qo‘lga kirita olmagan va guruhning quyi pog‘onasida joylashgan.
Qayd etish joiz, saudiyalik klub mahalliy musobaqalardagi tanaffusdan unumli foydalangan. Jamoa BAAning Dubay shahrida o‘quv-mashg‘ulot yig‘ini o‘tkazib, ikki o‘rtoqlik uchrashuvida ishonchli g‘alabalar qayd etdi. Ilk bahsda «Palm Siti» 6:0 hisobida mag‘lub etilgan bo‘lsa, ikkinchi o‘yinda «Galf Yunayted» ustidan 5:0 hisobida zafar quchildi.
Bu holat «Al Ittihod»ning «Nasaf»ga qarshi o‘yinga yuqori ruh va yaxshi tayyorgarlik bilan chiqishini ko‘rsatadi. Muxlislarni esa qiziqarli va keskin bahs kutmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
