Samarqandning "Dinamo" klubi qishki transferlar oynasida seleksiya ishlarini faol davom ettirmoqda. 2026 yilgi mavsum oldidan tarkibni mustahkamlashni maqsad qilgan jamoa navbatdagi yangi o‘yinchisini rasman e’lon qildi. Klub Burkina-Faso milliy jamoasiga nomzod tayanch yarimhimoyachi Dramane Salou bilan kelishuvga erishgan.
Klub matbuot xizmati tarqatgan ma’lumotga ko‘ra, murabbiylar shtabi tayanch yarimhimoya chizig‘i uchun bir nechta variantlarni o‘rganib chiqqan. Natijada tanlov tajribali va jismonan baquvvat futbolchi — Salouga to‘xtagan. 27 yoshli yarimhimoyachi «Dinamo»ga erkin agent maqomida qo‘shildi.
Dramane Salou faoliyati davomida turli chempionatlarda munosib tajriba to‘plagan. U Burkina-Faso milliy jamoasi safida hozirga qadar 8 ta o‘yinda maydonga tushgan. Xususan, 2025 yilda 2026 yilgi jahon chempionati uchun Afrika qit’asi saralash bosqichi doirasida o‘tkazilgan ikki uchrashuvga jalb etilgani uning xalqaro darajada ham ishonchga ega ekanini ko‘rsatadi.
Salouning oxirgi klubi Isroilning "Hapoel Hayfa" jamoasi bo‘lgan. U yerda u bir yil ichida 33 ta rasmiy uchrashuvda qatnashib, jamoaning asosiy futbolchilaridan biri sifatida harakat qildi. Bundan avval esa yarimhimoyachi Armanistonning "Urartu" klubi safida 2023/24 yilgi mavsumni juda samarali o‘tkazgan. U chempionat, milliy kubok va Yevropa Chempionlar ligasi saralash bosqichlarida jami 42 ta o‘yin o‘tkazib, 3 ta gol muallifiga aylangan.
Klubda Salouning jismoniy tayyorgarligi, maydon markazida kurashuvchanligi va taktik intizomi yuqori baholanmoqda. «Dinamo» rahbariyati uning tajribasi va xarakteri jamoaga yangi bosqichga chiqishda yordam berishini kutyapti.
— Dramane Salou «Dinamo» safida munosib o‘yin namoyish etib, jamoamiz bilan birga yangi tarix yoza olishiga ishonamiz, — deyiladi samarqandliklar rasmiy xabarida.
Qisqasi, «Dinamo» qishki transferlar oynasida jiddiy niyat bilan ishlayapti. Salouning qo‘shilishi esa Samarqand jamoasining yangi mavsumdagi maqsadlari katta ekanidan darak beradi.
Mehmon guruhidagi foydalanuvchilar ushbu nashrga izoh qoldira olmaydi.
