Poytaxtimizda sport muxlislari uchun muhim va esda qolarli tadbir — “Milliy sport mukofoti-2025” tantanali taqdirlash marosimi bo‘lib o‘tdi. Ushbu an’anaviy marosimda yil davomida xalqaro va mahalliy musobaqalarda yurtimiz sharafini munosib himoya qilgan sportchilar, tajribali murabbiylar hamda sohada samarali mehnat qilgan mutaxassislar munosib ravishda e’tirof etildi.
Marosimning eng yorqin lahzalaridan biri — taekvondo WT bo‘yicha O‘zbekiston milliy terma jamoasi a’zosi Najmiddin Qosimxojiyevning “yil kashfiyoti” nominatsiyasida g‘olib deb topilgani bo‘ldi. Yosh sportchining ushbu mukofotga sazovor bo‘lishi bejiz emas. U joriy yilda o‘tkazilgan jahon chempionatida oltin medalni qo‘lga kiritib, nafaqat mutaxassislar, balki keng sport jamoatchiligi e’tiborini ham o‘ziga qaratdi.
Tadbir davomida ta’kidlanganidek, Qosimxojiyevning g‘alabalari uning tinmay mehnat qilishi, intizomi va katta irodasi samarasidir. Qisqa vaqt ichida u taekvondo olamida yangi yulduz sifatida tanildi va kelajakda yanada katta yutuqlarga erishishiga ishonch bildirildi.
Ma’lumotlarga ko‘ra, ushbu yangilikni O‘zbekiston taekvondo WT assotsiatsiyasi rasman tasdiqlagan. Assotsiatsiya vakillari sportchining muvaffaqiyati butun jamoa mehnati natijasi ekanini qayd etib, uning xalqaro arenalardagi chiqishlari mamlakatimiz sport imijiga katta hissa qo‘shayotganini ta’kidladi.
“Milliy sport mukofoti-2025” marosimi yana bir bor O‘zbekiston sportida avlodlar almashinuvi va yangi iqtidorlar yetishib chiqayotganini namoyon etdi. Najmiddin Qosimxojiyev kabi yosh chempionlarning muvaffaqiyati esa minglab bola-yoshlar uchun ilhom manbai bo‘lib xizmat qilayotgani shubhasiz.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
