Komoning bosh murabbiyi Sesk Fabregas Pisa ustidan 3:0 hisobidagi g'alabadan so'ng jamoa o'yini va jarayon haqida fikr bildirdi. Uchrashuv A Seriyaning 19-turi doirasida o'tdi. Bu haqda euro-football.ru xabar beradi.
Mutaxassis natija muhim bo'lsa-da, asosiy e'tibor jamoaning rivojlanishida ekanini aytdi. Fabregas Pisani yaxshi tayyorgarlik ko'rgan, kurashuvchan raqib sifatida e'tirof etib, Komo o'yin davomida chiziqlar orasidagi bog'lanishni yaxshilash uchun ayrim detallarni o'zgartirib, yechim izlashiga to'g'ri kelganini ta'kidladi.
Turnir jadvalidagi yuqori o'ringa qaramay, Fabregas chempionlik haqidagi gap-so'zlarni hozircha erta deb hisoblaydi.
Uning so'zlariga ko'ra, chempionlik haqida Inter, Yuventus, Napoli va Milan kabi jamoalar gapirishi mumkin, Komo esa bu mavzuni hozir muhokama qilmaydi.
Oldinga qarab, Fabregas klub Italiyada ko'proq mahalliy iqtidorlarni rivojlantirish niyatida ekanini ham yashirmadi. U Komo safida italiyalik futbolchilar ko'proq bo'lishi mantiqan to'g'ri ekanini qayd etib, 2-3 yildan keyin bu yo'nalish bo'yicha natijalarni boshqa nuqtai nazardan muhokama qilishga umid bildirdi.
Shuningdek, murabbiy hujumda porlab kelayotgan Anastasios Duvikasni alohida maqtadi. Fabregas uning jamoa uchun tinimsiz mehnat qilayotgani, mentaliteti to'g'ri ekanini aytib, 26 yoshli futbolchida hali o'sish uchun imkoniyatlar ko'pligini urg'uladi.
19-turdan keyin Komo 33 ochko bilan jadvalda to'rtinchi o'rinda bormoqda, Pisa esa 12 ochko bilan 20-pog'onada qolmoqda.
“Zamin”ni Telegramʻda oʻqing!
