Termizning «Surxon» klubida yangi sahifa ochilyapti: jamoa murabbiylar shtabida jiddiy o‘zgarishlar amalga oshirildi. Klub matbuot xizmati ma’lum qilishicha, bosh murabbiy Fevzi Davletov hamda jismoniy tayyorgarlik bo‘yicha murabbiy Aleksey Nikolayev bilan hamkorlik rasman yakunlangan.
Rasmiy bayonotda qayd etilishicha, Davletov so‘nggi ikki mavsum davomida jamoaga rahbarlik qildi. Uning qo‘l ostida «Surxon» 65 ta rasmiy uchrashuv o‘tkazib, muhim tajriba to‘pladi va O‘zbekiston kubogida yarimfinalgacha yetib borish yo‘lida jiddiy qadam tashladi. Muxlislar uchun bu davr – ham qiyin pallalar, ham umid uyg‘otgan o‘yinlar bilan yodda qolishi tabiiy.
Klub esa jamoani yangi ruhda davom ettirish maqsadida bosh murabbiy lavozimiga Stanislav Kudryashovni tayinladi. U bungacha Davletovning yordamchisi sifatida ishlab kelgani, jamoaning ichki muhitini, futbolchilar xarakteri va klubning “oshxonasi”ni yaxshi bilishi muhim plyus sifatida qaralmoqda. Ya’ni, «Surxon» “noldan boshlash” emas, balki mavjud tizimni saqlagan holda yangi impuls berish yo‘lini tanlayapti.
Klub ma’lumotiga ko‘ra, yangilangan murabbiylar shtabi to‘liq tarkibi keyinroq e’lon qilinadi. Demak, bu o‘zgarishlar faqat boshlanishi bo‘lishi mumkin — oldinda yana qator tayinlovlar bo‘lishi ehtimoldan xoli emas.
Bayonot so‘ngida «Surxon» rahbariyati Fevzi Rizayevich va Aleksey Vladimirovichga qilingan mehnat va hamkorlik uchun alohida minnatdorlik bildirib, ularning keyingi faoliyatiga omad tilagan.
Endi eng qiziq savol: Kudryashov qo‘lida «Surxon» qanday uslubda o‘ynaydi, qanday yangiliklar bo‘ladi va jamoa natijasi qay darajaga chiqadi? Bir narsa aniq — muxlislar oldinda yana “kayfiyatli” bir mavsumga tayyor tursa arziydi.
“Zamin”ni Telegramʻda oʻqing!
