«Barselona» prezidenti Joan Laporta Ispaniya Superkubogidagi g‘alaba va jamoaning maydondagi namoyishi haqida o‘z taassurotlari bilan bo‘lishdi. Uning so‘zlariga ko‘ra, jamoa to‘liq uyg‘unlik va yuqori professional darajada o‘ynamoqda, bu esa natijalarda o‘z aksini topmoqda.
Laporta final o‘yinini katta qiziqish va hayrat bilan kuzatganini ta’kidlab, futbolchilarning yoshligiga qaramay, jamoada a’lo uyg‘unlik va kuchli oilaviy muhit yaratilganini urg‘uladi. Shu munosabat bilan natija ham jamoaning darajasini namoyon etganini ta’kidladi.
«Jamoamiz qoyilmaqom futbol ko‘rsatmoqda. Chiroyli final bo‘ldi. Biz katta oilamiz. Futbolchilar yosh, tarkibimiz esa juda uyg‘un — natijaning o‘zi gapiradi.», — deydi Laporta Movistar efirida.
Uning fikricha, bosh murabbiy Xansi Flik va uning murabbiylar shtabi jamoaning muvaffaqiyatining asosiy arxitektorlari hisoblanadi. Laporta ayni shu mutaxassislar rahbarligida o‘tgan mavsumdagi yutuqlarni yana takrorlash va hattoki yanada yuqori natijalarga erishishni maqsad qilganini ma’lum qildi.
«Hansi Flik va uning murabbiylar shtabi a’lo darajada ishlayapti, aynan ular — bu muvaffaqiyatning arxitektorlari. Biz o‘tgan mavsumdagi yutuqlarni yana takrorlashni, hattoki undan ham yaxshiroq natijaga erishishni maqsad qilganmiz.», — deydi Laporta.
Prezidentning so‘zlariga ko‘ra, «Barselona» va «Real Madrid» o‘rtasidagi final o‘yinida favoritlikni belgilash qiyin bo‘lgan. Hatto biroz yaxshiroq formada bo‘lsalar-da, raqib hisobni tenglashtirganda jamoa biroz asabiylashgan, ammo taslim bo‘lmagan. Bu esa finaldagi tabiiy holat sifatida baholanadi va muxlislar uchun o‘yinni yanada qiziqarli qiladi.
Shu tariqa, Laporta g‘alabani jamoa uchun muhim va ilhomlantiruvchi voqea sifatida baholab, «Barselona»ning kelgusidagi rejalariga ishonch bildirdi.
“Zamin”ni Telegramʻda oʻqing!
