Dushanba kuni yaxshi formaga kirib olgan «Al-Hilol» o‘z maydonida yaqindagina peshqadam bo‘lib turgan «Al-Nasr»ni qabul qildi. Bu haqda euro-football.ru xabar beradi.
Uchrashuv boshida Kingsli Koman o‘ng qanotdan yorib kirib, uzoq burchakka yo‘llagan zarbasi bilan xavfli vaziyat yaratdi, biroq to‘p darvozani biroz chetlab o‘tdi. Keyinroq uzatmalar yetib kelmayotganidan norozi bo‘lgan Krishtianu Ronaldu masofadan chap pastki burchakka zarba berdi, darvozabon esa to‘pni burchak zarbasiga chiqarib yubordi. 42-daqiqada Joau Felish oldinga pas tashladi, Koman o‘ngdan chapga oshirdi va Ronaldu oyog‘i bilan mahoratli tarzda to‘pni tarmoqqa joyladi — 0:1.
57-daqiqada «Al-Hilol» penaltidan hisobni tenglashtirdi: Salem al-Davsari to‘pni chap burchakka aniq yo‘lladi, darvozabon esa yo‘nalishni topa olmadi — 1:1. Oradan ko‘p o‘tmay mehmonlar posboni Navaf al-Akidi gol epizodidan keyin Ruben Neveshga nisbatan keraksiz harakati uchun qizil kartochka oldi va «Al-Nasr» maydonda bir kishi kam qoldi.
81-daqiqada burchak zarbasidan keyingi davomiy hujum yakunida to‘p yana Nevesh turgan hududga qaytdi. Portugaliyalik yarim himoyachi o‘yindan uzatma berdi, Mohamed Kanno esa oyog‘ini qo‘yib, to‘pni darvozaga burib yubordi — 2:1. 90-daqiqada mezbonlar yana penalti tepdi: bu safar Nevesh chap burchakni nishonga oldi, darvozabon esa boshqa tomonga sakradi — 3:1.
Shu g‘alabadan keyin «Al-Hilol» turnir jadvalida 7 ochkolik farq bilan peshqadamligini mustahkamladi. Ronaldu jamoasi esa ikkinchi o‘rinni bo‘lishib turgan bo‘lsa-da, ketma-ket uchinchi mag‘lubiyatini qabul qildi.
“Zamin”ni Telegramʻda oʻqing!
