13 yanvar kechqurun Maykl Kerrik “Manchester Yunayted”da vaqtinchalik bosh murabbiy sifatida ish boshladi. Oradan bir kun o‘tmay, “qizil iblislar” ijarada yurgan futbolchilar masalasida ham birinchi qadamlarni tashladi — klub yoshlar bo‘yicha rejani uzoqqa cho‘zmay, tezkor qaror e’lon qildi.
Klub matbuot xizmati ma’lumotiga ko‘ra, markaziy himoyachi Jo Xyugill hamda o‘ng qanot himoyachisi Xabib Ogunneye ijara shartnomasi muddatidan oldin bekor qilinib, jamoaga qaytarildi. Ushbu ikki iqtidorli futbolchi bu paytgacha Angliyaning quyi ligalarida tajriba to‘plab kelayotgan edi: Xyugill “Barnet”da, Ogunneye esa “Nyuport Kaunti” safida o‘ynadi.
Qayd etish joiz, Xyugill “Yunayted” muhitida begona emas — u avval ham asosiy jamoa bilan birga mashg‘ulotlarda qatnashgan, mavsumoldi yig‘inlarida esa o‘zini yaxshi tomondan ko‘rsata olgan. Demak, u klub talablarini biladi, intensivlikka moslashish unga osonroq kechishi mumkin.
Ogunneye haqida ham yaxshi signal bor: u joriy mavsum professional faoliyatidagi ilk golini urdi. Himoyachi uchun gol har doim qo‘shimcha plyus — bu nafaqat ishonch, balki o‘yindagi faollik va ruhiy tayyorgarlikni ham ko‘rsatadi.
Endilikda eng qizig‘i — bu qaytishlar nimani anglatadi? Kerrik kelishi bilan jamoada raqobat kuchayadi, tarkibda “rezerv” emas, haqiqiy variantlar ko‘payadi. Yoshlar esa aynan shunday pallada o‘zini ko‘rsatib qolsa, keyin “ijaraga ketib kelish” emas, to‘g‘ridan to‘g‘ri asosiy jamoada o‘rin olish haqida gap ketishi mumkin.
Qisqasi, qaror bitta: “Yunayted”ga hozir kerak bo‘lgan narsa — yangi nafas va yangi energiya. Xyugill va Ogunneye esa bu energiyaning tayyor akkumulyatori bo‘lib qaytdi.
“Zamin”ni Telegramʻda oʻqing!
