Saudiya Proligasining 16-turida «An Nasr» o‘z maydonida «Ash Shabob»ni qabul qildi va haqiqiy dramatik ssenariyda kechgan bahsda 3:2 hisobida g‘alaba qozondi. Uchrashuv oson kechmadi: maydonda keskinlik, tezkor gollar va hatto ikki tomonlama avtogollar “shou”si ham bo‘ldi.
Bellashuvda juda erta — 2-daqiqaning o‘zidayoq hisob ochildi. «Ash Shabob» futbolchisi Balobaid o‘z darvozasiga to‘p kiritib qo‘ydi va mezbonlar uchun ishni yengillashtirgandek tuyuldi. Oradan ko‘p o‘tmay, 8-daqiqada Koman hisobni yanada kattalashtirib, «An Nasr»ni 2:0 oldinga olib chiqdi.
Biroq «Ash Shabob» tezda o‘zini qo‘lga oldi. 31-daqiqada «An Nasr» safidagi Simakan ham avtogolga yo‘l qo‘yib, raqibni o‘yinga qaytardi. Ikkinchi taym boshida esa Junior 53-daqiqada to‘p kiritib, hisobni 2:2 ko‘rinishiga keltirdi. Shu paytda stadiondagi kayfiyat ham o‘zgardi: g‘alaba masalasi yana “ochiq” qoldi.
Qiyin pallada «An Nasr»ni oldinga tortib chiqqan gol 76-daqiqada G‘arib hisobiga yozildi. Uning aniq zarbasi mezbonlarga 3:2 hisobida ustunlik va nihoyatda muhim uch ochkoni olib keldi.
E’tiborli jihati — Krishtianu Ronaldu bu safar maydonni golsiz tark etdi. Shunga qaramay, «An Nasr» jamoa sifatida kurashchanlik ko‘rsatib, qiyin o‘yinda ham natijani “ushlab qolish”ni uddaladi.
Ushbu g‘alabadan so‘ng Riyod klubi ochkolarini 34 taga yetkazib, turnir jadvalida yana 2-o‘ringa qaytdi. «Ash Shabob» esa 11 ochko bilan 14-pog‘onada qolmoqda.
Saudiya Proligasi. 16-tur
An Nasr – Ash Shabob 3:2
Gollar: Balobaid 2 (avtogol), Koman 8, G‘arib 76 – Simakan 31 (avtogol), Junior 53.
An Nasr – Bento, Al G‘annam, Simakan, Martines, Boushal (Al Nasser, 65), Vesli (G‘arib, 65), Al Haybari, Angelo (Al Hassan, 90+1), Koman, Feliks, Ronaldu.
“Zamin”ni Telegramʻda oʻqing!
