Xalqaro boks federatsiyasi (IBF) 79,4 kg (yarim og‘ir vazn) toifasida chempionlik jangi bo‘yicha rasmiy qarorini e’lon qildi. Endi rossiyalik chempion Dmitriy Bivol nemis bokschisi Mixael Ayfertga qarshi ringga ko‘tariladi, deb xabar bermoqda “Boxing Scene” nashri.
E’tiborli jihati shundaki, IBF ushbu qarorni ikkinchi marta tasdiqlayapti. Dastlab Bivol — Ayfert to‘qnashuvi 2025 yil oxiriga belgilangan edi. Biroq rossiyalik bokschi bel qismida o‘tkazgan operatsiyadan keyin tiklanish jarayoni sabab tibbiy kechiktirish olgan va jang vaqti surilgan.
Shu tariqa, chempionlik bahsi yana kun tartibiga qaytdi. Bivol uchun bu — unvonni himoya qilish, o‘z vaznidagi mavqeini mustahkamlash va raqiblarga “men hali shu yerdaman” degan signal berish imkoniyati.
Mixael Ayfert haqida qisqacha to‘xtalsak, u 2018 yildan professional boksda faoliyat yuritib kelmoqda. Nemis bokschisining eng katta yutuqlaridan biri — sobiq jahon chempioni, kanadalik Jan Paskal ustidan qo‘lga kiritgan g‘alabasi hisoblanadi. Bu natija Ayfertning oddiy raqib emasligini, katta sahnaga tayyorligini ko‘rsatgan voqealardan biri bo‘lgan.
Albatta, bu jang atrofidagi asosiy savollar hozirdanoq tug‘ilyapti: operatsiyadan keyin Bivol qanday sport formasida bo‘ladi, Ayfert esa chempionga qarshi jangda qay darajada xavfli qurollarini ishga sola oladi? Bir narsa aniq — IBF tasdiq berdi, demak chempionlik oqshomi endi real ssenariyga aylandi. Muxlislarga esa qolgani — sanani kutish va katta to‘qnashuvga tayyor turish.
“Zamin”ni Telegramʻda oʻqing!
