«Real»ning sobiq yarimhimoyachisi Toni Kroos «Santyago Bernabeu» tribunalarida Vinisius Juniorga nisbatan hushtakbozlik kuzatilgani haqida o‘z fikrini bildirdi. Uning ta’kidlashicha, bu holat yoqimli ko‘rinmasligi mumkin, ammo «Real»dek klubda o‘ynash nimani anglatishini ham ochiq-oydin ko‘rsatib beradi.
Kroosning aytishicha, bir tanish mashhur shaxs unga shunday degan: agar futbolchi «Bernabeu»da hushtakbozlikka uchramagan bo‘lsa, uni haqiqatan buyuk deb bo‘lmaydi. Nemis futbolchisi o‘z tajribasini ham esladi: 2019-yilda «Real» Chempionlar ligasida «Ayaks»ga 1:4 hisobida mag‘lub bo‘lgan bahsdan keyin unga nisbatan ham hushtakbozlik bo‘lganini eshitgan.
«Albatta, bu “Real”ning eng yaxshi jihati emas», deydi Kroos. Biroq u bu holat klubda bo‘lish, u yerda shartnoma imzolash — g‘alaba talab qilinadigan, har o‘yinda yuqori daraja kutiladigan muhit ekanini anglatishini ta’kidladi.
Sobiq yarimhimoyachi fikricha, matbuot ham, muxlislar ham odatda nomdor, ko‘pchilik e’tiboridagi futbolchilarni ko‘proq tanqid qiladi. Kam tanilgan o‘yinchilar esa bu bosimdan ko‘p hollarda chetda qoladi. Yaxshimi-yo‘qmi, hushtak ham, e’tiroz ham ko‘pincha aynan katta nomlarga qaratadi.
Kroos hushtakbozlik o‘yin boshlanishidan oldinyoq eshitilsa, bu jamoa uchun ham, futbolchining ruhiyati uchun ham ishni yengillashtirmasligini aytdi. Chunki maydonga chiqishdan avval bosim oshadi, xatoga yo‘l qo‘yish qo‘rquvi kuchayadi va o‘yinni erkin olib borish qiyinlashadi.
Shu bilan birga, u hozirgi vaziyatdan chiqishning yagona yo‘li borligini ochiq aytdi: natija, to‘g‘ri ruhiy holat va sifatli o‘yin. «Biz buni o‘zimiz ham boshdan kechirganmiz», deya qo‘shimcha qildi Kroos Einfach mal Luppen podkastida.
“Zamin”ni Telegramʻda oʻqing!
