Xabi Alonso «Liverpul»da Arne Slot o‘rnini egallashi mumkin bo‘lgan asosiy nomzodlardan biri sifatida tilga olinmoqda. Mersisayd klubi niderlandiyalik mutaxassis boshqaruvidagi ikkinchi mavsumda hamon barqaror o‘yinini topa olmayapti. Bu haqda euro-football.ru xabar beradi.
Yaqinda «Bornmut»ga 2:3 hisobida mag‘lub bo‘lingach, matbuotda Slotning kelajagi yana muhokama markaziga qaytdi. Bu fonni kuchaytirgan yana bir holat — ikki hafta avval Alonso «Real» (Madrid)dan bo‘shatilgani va u yana ishga qaytishga tayyor ekani.
Biroq insayder Fabritsio Romano ma’lumotiga ko‘ra, «Liverpul» hozircha ispaniyalik murabbiy yoki uning agentlari bilan rasmiy aloqaga chiqqani yo‘q.
«Menda “Liverpul”ning Alonso agentlari bilan rasmiy kontakti haqida hech qanday ma’lumot yo‘q. Xabi imkon qadar tezroq qaytishni xohlayapti. “Liverpul” uni avval ham ko‘rib chiqqan va hozir ham yuqori baholaydi. Agar klub o‘zgarish qilishga qaror qilsa, u nomzod bo‘lishi mumkin, ammo hozircha bunday qadam haqida menda tasdiqlangan yangilik yo‘q», — dedi Romano.
Arne Slot jamoasi chorshanba kuni Chempionlar ligasida «Qorabog‘»ga qarshi maydonga tushadi.
“Zamin”ni Telegramʻda oʻqing!
