Liverpul muxlislari uchun shanba kuni Enfildda Chelsi bilan durang qayd etilgani yetmagandek, dushanba kuni London klubi Xabi Alonso bilan muzokaralarni boshlagani haqidagi xabarlar jamoa ishqibozlarini yanada tushkunlikka soldi. Alonso ko‘pchilik uchun Liverpul muammolariga yechim sifatida ko‘rilayotgan edi, chunki u Bayer Leverkusen bilan mag‘lubiyatsiz mavsumni o‘tkazib, o‘zini Yevropaning eng iqtidorli murabbiylaridan biri sifatida namoyon etgandi. Bu haqda Goal.com xabar beradi.
Yurgen Klopp ketganidan so‘ng, aynan Xabi Alonso muxlislarning asosiy nomzodi edi. Biroq klub rahbariyati Arne Slotga ishonch bildirishda davom etmoqda. Hatto Real Madrid bilan xayrlashganidan so‘ng ham, ispaniyalik mutaxassis Liverpulning rejalariga kirmagani tushunarsiz holat bo‘lib qolmoqda.
Arne Slot qo‘l ostidagi Liverpul so‘nggi 71 yildagi eng yomon natijalarni qayd etmoqda va chempionlik poygasidan erta chiqib ketdi. Muxlislar murabbiyning o‘tgan mavsumdagi xizmatlarini hurmat qilishsa-da, hozirgi o‘yin uslubi va natijalar ularning sabrini tugatdi. Jamoa o‘z maydonida Chelsi kabi inqirozga uchragan jamoaga qarshi ham tartibsiz o‘yin ko‘rsatgani vaziyat naqadar jiddiy ekanini ko‘rsatadi.
O‘yin davomida Rio Ngumohaning almashtirilishi muxlislarning g‘azabini keltirdi. Garchi Slot yosh futbolchida mushak tortishishi kuzatilganini aytgan bo‘lsa-da, muxlislar uchun bu qaror jamoaning umumiy inqirozi fonida yana bir xato sifatida qabul qilindi. Liverpul rahbariyati vaziyatni o‘nglash uchun zudlik bilan chora ko‘rmasa, mavsum yakuni klub uchun yanada ayanchli bo‘lishi mumkin.
“Zamin”ni Telegramʻda oʻqing!
