Mikel Arteta shogirdlari bir yarim oy deganda ilk marta mag‘lubiyat achchig‘ini totib ko‘rishdi. Londonning «Arsenal» klubi APLning 23-turida o‘z maydonida «Manchester Yunayted»ni qabul qildi va dramatik kechgan bellashuvda 2:3 hisobida imkoniyatni boy berdi.
Bu natija «kanonirlar» uchun shunchaki bir mag‘lubiyat emas — uzoq vaqtlik mag‘lubiyatsiz seriyaning uzilishi hamdir. «Arsenal» oxirgi marta 2025-yil 6-dekabr kuni «Aston Villa»ga qarshi bahsda 1:2 hisobida yutqazgan edi. O‘shandan beri jamoa yaxshi tempni ushlab kelayotgan, ketma-ket 9 ta g‘alaba va 3 ta durang qayd etib, raqiblarga “oson ochko yo‘q” degan signalni berib kelgandi.
«Manchester Yunayted»ga qarshi o‘yinda ham «Arsenal» oxirigacha kurashdi, hisobni tenglashtirdi, hatto qayta-qayta bosim o‘tkazdi. Lekin ba’zi mayda xatolar, ayrim epizodlardagi diqqatsizlik va “bir lahza”lik sustkashlik raqibga qimmat g‘alaba eshigini ochib berdi. Natijada, o‘z maydonidagi mag‘lubiyat londonliklarning kayfiyatini tushirgan bo‘lsa-da, jamoa uchun yana bir muhim signal bo‘ldi: chempionlik poygasida har bir daqiqa — imtihon.
Endi «Arsenal»ning diqqati yevrokuboklarga ko‘chadi. Arteta jamoasi 28-yanvar kuni Chempionlar Ligasi doirasida Qozog‘istonning «Qayrat» jamoasiga qarshi maydonga tushadi. Bu bahs mag‘lubiyatdan keyin ruhiy jihatdan ham, turnir vazifalari nuqtayi nazaridan ham juda muhim bo‘ladi.
Xulosa bitta: mag‘lubiyat — yiqilish emas, to‘xtash. Agar «Arsenal» shu “og‘riqli saboq”ni to‘g‘ri qabul qilsa, oldindagi yevrokubok bahslarida jamoa yanada qattiqroq, yanada achchiqroq qaytishi mumkin.
“Zamin”ni Telegramʻda oʻqing!
