Angliya Premer-ligasining 24-tur uchrashuvlari yanada qiziq pallaga kirdi. Tur doirasida «Manchester Yunayted» o‘z maydonida «Fulhem»ni qabul qildi va «Old Trafford»dagi serhayajon to‘qnashuv 3:2 hisobida mezbonlar foydasiga hal bo‘ldi.
Uchrashuvda hisob 19-daqiqada ochildi: Kazemiro tayinli zarbasi bilan «Yunayted»ni oldinga olib chiqdi. Ikkinchi bo‘lim boshlangach, londonliklar bosimni oshirdi, ammo 56-daqiqada Kunyaning goli mankunianlarning qo‘lini yanada mustahkamladi.
Shu bilan o‘yin tugaganday tuyuldi, lekin «Fulhem» oxirgi daqiqalarda haqiqiy “o‘yin qaytishi”ni boshladi: 85-daqiqada Himenez penaltidan gol urdi, 90+1-daqiqada esa Kevin muvozanatni tiklab, stadionni bir zumda shovqinga ko‘mdi.
Ammo “Old Trafford” kechalari odatda syurprizsiz o‘tmaydi: 90+4-daqiqada maydonga keyinroq qo‘shilgan Sheshko hal qiluvchi to‘pni kiritib, «Yunayted»ga dramatik g‘alaba sovg‘a qildi.
Bu natijadan so‘ng «Manchester Yunayted» 41 ochko jamg‘arib, turnir jadvalida 4-o‘ringa ko‘tarildi. «Fulhem» esa 34 ochko bilan hozircha 8-pog‘onada qolmoqda.
Parallel o‘yinlarda nima bo‘ldi?
Turning boshqa bellashuvlari ham kam hayajonli bo‘lmadi:
- «Aston Villa» o‘z uyida «Brentford»ga 0:1 hisobida imkoniyatni boy berdi. Yagona gol 45+1-daqiqada Ouattara tomonidan urildi. Biroq «Aston Villa» jamoasi 46 ochko bilan onlayn jadvalda hozircha 2-o‘rinda saqlanib turibdi.
- «Nottinghem Forest» va «Kristal Pelas» o‘rtasidagi bahs 1:1 hisobida durang bilan yakunlandi. Gollar: Gibbs-Uayt 5-daqiqada, Sarr esa 45+2-daqiqada javob qaytardi.
O‘yin ma’lumotlari
APL, 24-tur
MYU – Fulhem 3:2
Gollar: Kazemiro 19, Kunya 56, Sheshko 90+4 – Himenez 85 (pen), Kevin 90+1
«Manchester Yunayted»: Lammens, Dalot (Mazraui, 86), Maguayr, Martines, Fernandesh, Kunya (Sheshko, 74), Amad, Kazemiro (Ugarte, 75), Mbeumo, Shou, Maynu.
«Fulhem»: Leno, Andersen, Berge, Kastan, Chukuveze (Keyrni, 79), Kuenka (Beyssi, 86), Ivobi, Himenez, Robinson (Sesseynon, 71), Smit-Rou (Kevin, 71), Uilson.
Aston Villa – Brentford 0:1
Gol: Ouattara 45+1
Nottinghem Forest – Kristal Pelas 1:1
Gollar: Gibbs-Uayt 5 – Sarr 45+2
Agar shu temp ketsa, 24-tur “nervlar turi” bo‘lib tarixda qoladi — ayniqsa, oxirgi daqiqalarda gol qidiradigan jamoalar uchun.
“Zamin”ni Telegramʻda oʻqing!
