Akmal Mozgovoy rasman "Paxtakor" futbolchisiga aylandi. Bu haqda klub matbuoti ma’lum qildi.
Xabarga ko‘ra, milliy terma jamoamiz yarimhimoyachisi BAAdagi "Baniyas" klubidan “Paxtakor”ga transfer qilingan. Tomonlar o‘rtasida 2027 yil oxirigacha amal qiladigan shartnoma imzolangani qayd etildi.
Akmal Mozgovoyning hozirgacha to‘plagan raqamlari ham bejiz emas: u Superligada 163 o‘yinda maydonga tushib, 13 bor raqib darvozasini ishg‘ol qilgan. Osiyo klublari musobaqalarida esa 30 bellashuvda 5 to‘p kiritgan. Milliy terma jamoa safida 21 bahs o‘tkazib, 1 gol muallifi bo‘lgan.
Klub bayonotida Mozgovoyning “Paxtakor”dagi faoliyati yorqin g‘alabalar va sovrinlarga boy bo‘lishiga ishonch bildirilib, futbolchiga iliq tilaklar yo‘llangan: “Paxtakor”ga xush kelibsan, Akmal!”
Endi eng qizig‘i oldinda: tajriba, temp va maydon markazidagi ishonchli o‘yin — “sherlar”ga aynan shu narsalar kerak edi. Mozgovoy esa o‘zini ko‘rsatish uchun “tayyor sahna”ga keldi.
“Zamin”ni Telegramʻda oʻqing!
