Foto: onedio.com
Turkiya futboli atrofida yana bir qiziq shov-shuv ko‘tarildi: xabarlarga ko‘ra, Turkiya prezidenti Rajab Toyyib Erdo‘g‘an N’Golo Kanteining Istanbulning «Fenerbahche» klubiga o‘tishida muhim rol o‘ynagan.
Istanbul klubi matbuot xizmati «Fenerbahche» prezidenti Sadettin Saranning so‘zlarini keltirib, transfer masalasidagi qo‘llab-quvvatlov uchun davlat rahbariga minnatdorchilik bildirganini ma’lum qildi. Saran ta’kidlashicha, bu kelishuv faqat klub uchun emas, umuman Turkiya futboli uchun ham manfaatli bo‘lishi mumkin.
Eslatib o‘tamiz, so‘nggi bir-ikki yil davomida fransiyalik tajribali yarim himoyachi Saudiya Arabistonida «Al-Ittihod» safida to‘p surdi. Undan oldin esa Angliyada «Lester» va «Chelsi»da o‘ynagan, jahon chempioni bo‘lgan va ikki karra Angliya chempioni unvonini ham qo‘lga kiritgan. Hozirda Kante 34 yoshda.
Ayni paytda «Fenerbahche» Turkiya chempionatida 46 ochko bilan ikkinchi o‘rinda bormoqda. Peshqadam «Galatasaroy»dan ortda qolish — uch ochko. Shu bois, muxlislar bu transfer amalga oshsa, chempionlik poygasidagi kurash yanada qizishini kutyapti: tajriba, xarakter va mehnatkashlik deganda Kante nomi ko‘pchilikning xayoliga birinchi bo‘lib keladi.
“Zamin”ni Telegramʻda oʻqing!
