Krishtianu Ronaldu "Al-Nassr"dagi hozirgi vaziyatdan juda qattiq noroziligini yashirmadi va masalani “oddiy gap” darajasida qoldirmadi. Manbalarga ko‘ra, portugaliyalik superyulduz bu safar klub rahbariyatiga emas, bevosita Saudiya Arabistoni Davlat investitsiya jamg‘armasi atrofidagi qaror qabul qiluvchilarga aniq talablar bilan chiqqan.
Aytilishicha, Ronalduning asosiy e’tirozi — transfer siyosati. Uning qarashicha, jamoa tarkibini kuchaytirish masalasi yetarlicha jiddiy olib borilmayapti, hatto ba’zi resurslar boshqa yo‘nalishga burilyapti. Xususan, futbolchi bu resurslar "Al-Hilol"ni qo‘llab-quvvatlashga ko‘proq yo‘naltirilayotgani, bu esa chempionlik poygasida “teng maydon” tamoyiliga putur yetkazishi mumkinligini ishora qilgani haqida gaplar tarqaldi.
Ronaldu esa bunday manzaraga “ko‘nikib ketish” niyatida emas. U o‘zgarishlar aynan eng yaqin transfer oynasidayoq ko‘rinishi shartligini talab qilgan. Agar yozgi transfer davrida jamoa haqiqatan ham kuchaytirilmasa, u Saudiya Arabistonini tark etishga tayyor ekanini ochiq bildirgani aytilmoqda.
“Agar yozgi transfer davrida talablarim bajarilmasa, men ketaman”, — degan Ronaldu.
Manbaga ko‘ra, portugaliyalik yulduzning “Al-Nassr”da qolishi uchun ikki shart hal qiluvchi ahamiyatga ega:
- tarkibni real kuchaytirish, ya’ni chempionlikka mos darajada yangi futbolchilar olib kelish;
- jamg‘arma darajasida klublarga nisbatan adolatli va teng munosabat saqlanishi.
Shuningdek, avvalroq Ronaldu klubning ikki o‘yinida qatnashmagani, bu holat esa norozilik kayfiyatining amaldagi ko‘rinishi sifatida talqin qilingani haqida ham xabarlar tarqalgan edi. Endi esa bu mavzu yanada keskin tus olmoqda: yozdagi qarorlar faqat bir transfer oynasi emas, balki Ronalduning butun Saudiya sahifasini ham hal qilishi mumkin.
Futbolda ba’zan bir og‘iz gap butun mavsumga ta’sir qiladi. Ronalduning bu chiqishi ham shunga o‘xshaydi: yo jamoa “chindan chempionlik rejimi”ga o‘tadi yoki katta sahifalar yangidan ochilishi mumkin.
“Zamin”ni Telegramʻda oʻqing!
