37 yoshli polshalik gol mashinasi Robert Levandovski yana bir bor “statistika”ni tiriklayin deb yubordi. Yevropaning top chempionatlarida u XXI asrda faqat ikki ulkan yulduz — Lionel Messi va Krishtianu Ronaldu qila olgan tarixiy natijani takrorladi. Qisqasi, Leva “legendalar klubi”ga kirish uchun hech kimdan ruxsat so‘ramayapti — o‘ziyoq eshikni ochib kiryapti.
Manbalarga ko‘ra, La Liganing 2025/2026 yilgi mavsumida Levandovski 10 ta golga yetib ulgurdi. Shu bilan u Yevropaning kuchli beshta ligasida ketma-ket 15 mavsum davomida “ikki xonali” gollar chegarasini buzgan uchinchi futbolchiga aylandi. Bungacha bunday barqarorlikni faqat Ronaldu (16 mavsum) va Messi (15 mavsum) ko‘rsatgan — biri turli chempionatlarda, biri esa o‘z uslubida “bir maromda” yonib turgan.
Qizig‘i, Ronaldu bu natijani "Manchester Yunayted", "Real" va "Yuventus" safida qayd etgan bo‘lsa, Messi esa "Barselona" hamda PSJda shu barqarorlikni ushlab turgan. Levandovski esa bu rekordga La Liganing 23-turida "Malorka"ga qarshi 3:0 hisobidagi o‘yinda gol urib, rasman “galochka” qo‘ydi.
Polshalik hujumchi 2022 yil yozidan beri kataloniyaliklar safida to‘p suryapti. Undan oldin esa "Bavariya" va "Borussiya Dortmund"da ham o‘z so‘zini aytgan. Joriy mavsumda u barcha musobaqalarda 28 ta uchrashuvda ishtirok etib, 13 ta gol va 3 ta golli uzatma qayd etgan.
Xulosa shu: Levandovski yosh emas, lekin formada — xuddi “praym” rejimini o‘chirmay qo‘ygandek. Muxlislar uchun esa bu yangilikning ma’nosi oddiy: katta o‘yinlarda katta raqamlar chiqyapti — demak, oldinda yana shou bor.
“Zamin”ni Telegramʻda oʻqing!
