«Manchester Siti» bosh murabbiyi Xosep Gvardiola «Liverpul»ga qarshi dramatik bellashuvdan keyin (2:1) o‘yin taassurotlarini bayon qildi. Murabbiyning so‘zlariga ko‘ra, bu g‘alaba shunchaki uch ochko emas — jamoaning xarakteri, o‘ziga ishonchi va oxirigacha kurashish ruhi uchun ham katta signal.
Gvardiola, avvalo, birinchi bo‘limdagi o‘yindan mamnunligini yashirmadi. U jamoa o‘yinga juda yaxshi kirishganini, bir nechta o‘ta qulay imkoniyatlar yaratilganini, ammo ulardan foydalanishda “oxirgi qaror” va hal qiluvchi paslarda yetishmovchilik bo‘lganini ta’kidladi. Unga ko‘ra, aynan shu jihatda “Siti” yanada tiniqroq va diqqatliroq bo‘lishi shart.
Ikkinchi bo‘limga kelib esa tashabbus ko‘proq raqib tomoniga o‘tib ketgan. Gvardiola Dominik Soboslai urgan golni alohida e’tirof etib, uning zarbasini yuqori darajadagi ish sifatida baholadi. Murabbiy hatto bu gol uslubini boshqa bahsdagi o‘xshash epizod bilan taqqoslab, “qoyilmaqom zarba, qoyilmaqom futbolchi” degan mazmunda gapirdi.
Shunga qaramay, uchrashuvning hal qiluvchi nuqtasi — jamoaning taslim bo‘lmasligi bo‘lgan. Gvardiola aytganidek, oxir-oqibatda barchasini sardorning ishonchi, qattiq xarakteri va “ortga chekinmayman” degan kayfiyati hal qildi. Qolganlar ham shu ruh ortidan ergashdi va natijada «Siti» kambekni amalga oshirdi.
Murabbiy himoya chizig‘i haqida ham alohida to‘xtaldi. Uning ta’kidlashicha, Muhammad Saloh, Kodi Gakpo, Florian Virs kabi yuqori "klass"dagi ijrochilarni “bekorga” to‘xtatib bo‘lmaydi — bu juda katta mehnat, to‘g‘ri pozitsiya va sabr talab qiladi. «Siti» birinchi bo‘limda buni ancha yaxshi uddalagan, ikkinchi bo‘limda esa o‘yin kutilganidek og‘irlashgan.
Eng qiziq nuqta — Gvardiolaning kelajak haqidagi fikrlari bo‘ldi. U jamoada 90 daqiqa davomida barqarorlik hali to‘liq yo‘lga qo‘yilmaganini tan oldi, biroq rivojlanish yo‘lidan ketilayotganini aytib o‘tdi. “Hozir to‘liq tayyor emasdirmiz, lekin bir oydan keyin tayyor bo‘lishimiz mumkin”, degan mazmundagi fikr — muxlislar uchun ham ishora: jamoa endi shunchaki natija quvmayapti, balki formani to‘liq yig‘ishni maqsad qilyapti.
Shuningdek, Ruben Diashning safga qaytgani, boshqa o‘yinchilar ham asta-sekin tarkibga qo‘shilayotgani aytildi. Gvardiola bu avlodning kelajagini “porloq” deb baholab, klubning ertasi ham ishonchli qo‘llarda ekanini urg‘uladi.
Yana bir muhim gap — transferlar mavzusi. Murabbiy «Siti» haqiqatan ham yaxshi kuchayganini, ammo yangi kelganlar to‘liq moslashib olgach, jamoa yanada qudratli ko‘rinishga kirishini bildirdi. Qisqasi, bu g‘alaba — faqat bir kechalik kayfiyat emas: Gvardiola nazaricha, oldindagi oylarda «Manchester Siti» yana “o‘zining eng xavfli” versiyasiga yaqinlashadi.
Futbolda esa qoida bitta: xarakter bor joyda umid ham bor. Shu kechada «Siti» aynan shuni isbotladi.
“Zamin”ni Telegramʻda oʻqing!
