BAAda o‘tayotgan ikkinchi yig‘in doirasidagi ilk nazorat uchrashuvida «Dinamo» jamoasi Rossiyaning 10 karra chempioni «Zenit»ga qarshi maydonga tushdi. Uchrashuv juda tez sur’atda boshlandi va aynan shu shiddat “ko‘k-oqlar” uchun noxush ssenariyni tezda yozib qo‘ydi.
Bellashuvning 5-daqiqasida Aleksandr Yeroxin aniq zarba bilan hisobni ochdi. «Dinamo» himoyasi hali o‘yinga to‘liq kirishib ulgurmagan pallada o‘tkazib yuborilgan ana shu tezkor gol uchrashuv taqdirini hal qilib berdi — o‘yin oxirigacha hisob o‘zgarmadi.
Qizig‘i, «Zenit» safidagi yangi transferlardan biri — «An Nasr»ga tegishli hujumchi Jon Duran bu bahsni zaxiradan kuzatdi. Demak, raqib ham tarkibni to‘liq “ochib tashlamadi”, ko‘proq yig‘in rejasiga mos ravishda tarkibni sinab ko‘rishga urindi.
Shunga qaramay, «Dinamo» ikkinchi bo‘lim va o‘yinning qolgan qismida vaziyat yaratishga harakat qildi, zaxiradan tushgan o‘yinchilar hisobiga tempni oshirishga ham urindi. Ammo nazorat o‘yinlariga xos jihat — imkoniyat bor, lekin oxirgi nuqtada aniqlik va uyg‘unlik hali to‘liq “pishmagan”. Yig‘inning asosiy foydasi ham shu: kamchiliklarni hozir ko‘rib olib, rasmiy bahslar boshlanguncha tuzatib olish.
O‘rtoqlik o‘yini
«Dinamo» — «Zenit» 0:1
Gol: Aleksandr Yeroxin (5)
«Dinamo» tarkibi: Nemanov, Qodirqulov, Dembele, O‘rozov, Jumaboyev, Mavretich, To‘xtasinov, Abdusalomov, Amonov, Hojimirzayev, Abdurahmonov.
Zaxiradan tushganlar: U. Hoshimov, Xalilov, Yo‘ldoshev, Obloqulov, A. Hoshimov, Xudoyberdiyev, Abdumannonov, Salou, Abdullayev.
Yig‘in davom etadi — demak, oldinda yana yangi o‘yinlar, yangi sinovlar va tarkib bo‘yicha yangi xulosalar bor. Eng muhimi, bunday mag‘lubiyatlar yig‘inda “dars” bo‘ladi, chempionatda esa “ball” kerak.
“Zamin”ni Telegramʻda oʻqing!
