Saudiya Arabistonining “An-Nasr” klubida katta o‘zgarishlar shamoli esayapti. Klub rahbariyati mamlakat Professional ligasining eng mashhur yulduzi, jahon futbolida eng ko‘p gol urgan futbolchi sifatida tilga olinayotgan Krishtianu Ronaldu bilan xayrlashish variantini ham ko‘rib chiqishga tayyor ekani aytilmoqda.
Ma’lumotlarga ko‘ra, “An-Nasr” mutasaddilari portugaliyalik superyulduzni Angliya Premer-ligasi klublariga 40 million funt sterling atrofida taklif qilgan. TopSkills nashri xabarida qayd etilishicha, Angliyadan uchta klub bu taklifga darhol rad javobini bergan.
Shunga qaramay, saudiyaliklar “bo‘ldi, tamom” deyish niyatida emas: klub rahbariyati futbolchi uchun yangi manzil topish ustida ishni davom ettirayotgani aytiladi. Eng qiziq nuqta esa shuki, Ronaldu transferiga Lissabonning “Sporting” klubi jiddiy qiziqish bildirgani haqida gap-so‘zlar bor. Bu variant muxlislarda alohida his uyg‘otadi, chunki aynan “Sporting” — Ronalduning katta futbolga ilk qadam qo‘ygan joyi.
Eslatib o‘tamiz, Ronaldu 2022 yil 30 dekabr kuni erkin agent sifatida “An-Nasr” bilan rasman hamkorlikni boshlagan. Keyinroq, 2025 yil iyunida shartnoma 2027 yil yarmigacha uzaytirilgani aytilgan. Shu sabab bu xabarlar muxlislarni ikkiga bo‘lyapti: bir taraf “u hali kerak” deydi, boshqa taraf esa “katta ssenariy tayyorlanayotgandir” deb o‘ylaydi.
Moliyaviy tomon esa umuman alohida kino: ochiqlangan ma’lumotlarga ko‘ra, Ronaldu sport tarixidagi eng yuqori maoshlardan birini oladi. Uning daromadi shartnoma davomida tijorat bonuslari bilan birga 400 million AQSH dollaridan oshishi qayd etilgan.
Qisqasi, hozirgi vaziyatda bir narsa aniq: “An-Nasr” ham, Ronaldu atrofidagi bozor ham jim turmaydi. Agar “Sporting” varianti real tus olsa, bu faqat transfer emas — karyerani simvolik tarzda “boshlangan joyda yana bir bor yozish” bo‘ladi. Futbolda ba’zan ssenariylar rejissyorsiz ham zo‘r chiqadi-da.
