Londonning "Arsenal" klubi sobiq futbolchisi Pol Merson "Tottenhem"da bosh murabbiy almashgani yuzasidan fikr bildirdi. Klub Tomas Frank bilan xayrlashib, uning o'rniga Igor Tudorni tayinladi. Bu haqda euro-football.ru xabar beradi.
Mersonning aytishicha, yirik klublarda murabbiy uchun vaqt doim juda kam bo'ladi: natija talab qilinadi, aks holda bosim kuchayadi va ko'pincha aynan muxlislar kayfiyati iste'foga olib keladi. U Sky Sports'ga bergan izohida murabbiy ketayotgan payt butun stadion uning nomini baravariga hayqirishi juda kam uchrashini ham qo'shimcha qildi.
Ekspert fikricha, "Tottenhem" aynan noodatiy yechim izlashga majbur bo'lgan. Tudor qisqa muddatga — 12 o'yinlik vazifa bilan kelgani ta'kidlanadi. Mersonning mulohazasicha, agar u jamoani APLda olib qolsa, hamma buni tabiiy hol sifatida qabul qiladi, aks holda Tudorning keyingi manzili qanday bo'lishini tasavvur qilish qiyin.
Merson "Tottenhem" futbolchilari o'yinini tartibga solishi zarurligini aytdi: uningcha, ular "Arsenal" uslubiga yaqinroq — imkoniyatlardan kelib chiqib, hech bo'lmasa bir ochko olishga yo'naltirilgan pragmatik futbol o'ynashi kerak. Merson "Tottenhem" tarkibida yaxshi futbolchilar juda ko'pligini, ammo jamoa bo'lib tashkil topish muhimligini urg'uladi.
Hozirda "Tottenhem" 26 turdan so'ng 29 ochko bilan APL jadvalida 16-o'rinda bormoqda. Quyi ligaga tushib ketish zonasiga eng yaqin jamoa "Vest Hem" bo'lib, u "Tottenhem"dan 5 ochko kam jamg'argan.
“Zamin”ni Telegramʻda oʻqing!
