Myunxenning «Bavariya» klubi himoyachisi Konrad Laymer jamoa bilan shartnomani uzaytirish ehtimoli haqida fikr bildirdi. Bu haqda euro-football.ru xabar beradi.
Avstriyalik futbolchining aytishicha, hozircha bu borada jiddiy muloqotlar ketmayapti. «Hozir deyarli muzokaralar yo‘q. Men baribir xotirjamman, bu haqida ortiqcha bosh qotirishning keragi yo‘q», — deya uning so‘zlarini SPORT BILD keltirdi.
Laymer «Bavariya» safida 2023 yil yozidan beri to‘p suradi. Joriy mavsumda 28 yoshli futbolchi barcha turnirlarda 29 o‘yinda maydonga tushib, 2 ta gol urdi va 8 ta golli uzatma berdi.
Himoyachining nemis grandi bilan amaldagi bitimi 2027 yilning o‘rtalarigacha mo‘ljallangan. Transfermarkt ma’lumotiga ko‘ra, Laymerning transfer narxi 32 million yevroni tashkil etadi.
“Zamin”ni Telegramʻda oʻqing!
