Saudiya Proligasining 23-turi doirasida «An Nasr» o‘z maydonida «Al Hazm»ni yirik hisobda mag‘lub etdi — 4:0. Uchrashuv qahramoni esa yana odatdagidek Krishtianu Ronaldu bo‘ldi: portugaliyalik yulduz dubl muallifiga aylanib, jamoasiga ishonchli g‘alaba yo‘lini ochib berdi.
Bellashuvdan keyin e’tibor markaziga faqat gollar emas, Ronalduning kelajak haqidagi so‘zlari ham tushdi. Jurnalist Fabritsio Romano keltirgan iqtibosga ko‘ra, 41 yoshli hujumchi o‘z pozitsiyasini juda aniq bildirgan.
Ronaldu Saudiya Arabistonini o‘ziniki deb hisoblashini, aynan shu yerda faoliyatini davom ettirishni istashini aytdi. Uning ta’kidlashicha, bu mamlakat uni, oilasini va do‘stlarini iliq qabul qilgan. Shu sababli u o‘zini baxtli his qiladi va qolishni xohlaydi.
- Men Saudiya Arabistoniga tegishliman. Men shu yerda o‘ynashni davom ettirmoqchiman. Bu meni, oilamni va do‘stlarimni qabul qilgan mamlakat. Saudiyada baxtliman va qolishni istayman, - dedi Ronaldu.
Mavsum davomida Ronalduning formasi ham shunchaki gap emas. U «An Nasr» safida barcha musobaqalarda 22 ta o‘yinda qatnashib, 20 ta gol urishga ulgurdi. Bu — hujumchi uchun juda kuchli ko‘rsatkich, ayniqsa 41 yoshda bunday sur’atni ushlab turish har kimning qo‘lidan kelmaydi.
Qizig‘i, avvalroq Donald Tramp Ronalduni AQSHga chorlagani haqida xabarlar tarqalgandi. Lekin Krishtianuning bugungi bayonotidan keyin vaziyat yanada ravshan: u hozircha Saudiyada o‘zini joyida deb biladi va yo‘lini shu yerda davom ettirish niyatida.
«Al Hazm»ni yirik hisobda mag‘lub etgandan so‘ng "Al Nassr" turnir jadvalida birinchi o‘ringa chiqib oldi. Bu haqda Ronaldu quyidagi so‘zlarni aytdi:
"O‘z o‘rnimizga qaytdik. Endi yanada o‘sishda davom etamiz" — deb yozib qoldirgan hujumchi o‘zining ijtimoiy tarmoqdagi sahifasida.
Xulosa oddiy: Ronaldu uchun «An Nasr»dagi sahifa hali yopilmagan. Aksincha, dubl, katta hisob va qat’iy bayonot — bu yerda hali qiziq voqealar davom etishidan darak.
“Zamin”ni Telegramʻda oʻqing!
