O‘zbekiston milliy terma jamoasi va “Manchester Siti” himoyachisi Abduqodir Husanov haqida yana bir katta e’tirof yangradi. Bu safar fikrni klub va Argentina terma jamoasi afsonasi Serxio Aguero bildirdi. City Xtra orqali tarqalgan eksklyuziv mulohazalarda u Husanovning salohiyatini juda yuqori baholab, o‘zbekistonlik futbolchi “Siti”ning kelgusi yillardagi asosiy himoyachilaridan biriga aylanishi mumkinligini ta’kidlagani haqida xabarlar tarqaldi.
Haqiqatdan ham, 2025–2026 yilgi mavsum “Manchester Siti” uchun, ayniqsa himoya chizig‘ida, jiddiy sinovga aylandi. Turli jarohatlar sabab jamoa orqa chizig‘ida barqarorlik muammoga aylangan bir paytda, Husanovning tez o‘sishi va moslashuvi eng katta pozitiv yangiliklardan biri sifatida ko‘rilmoqda. U 2025-yil yanvar oyida “Lans”dan “Siti”ga o‘tgan va Reuters xabariga ko‘ra, klub u bilan to‘rt yarim yillik shartnoma imzolagan.
Dastlab Premer-ligaga kirishish oson kechmagan. Hatto debyut uchrashuvidagi xatodan keyin ham bosim katta edi. Ammo Pep Gvardiola o‘sha paytdayoq uni ochiq himoya qilib, yoshi va moslashuv jarayonini inobatga olish kerakligini aytgandi. Bu ishonch keyinchalik o‘zini oqlaganini ko‘rish qiyin emas.
Aynan shu fon ortida Agueroning bahosi yanada og‘irlik kasb etadi. Uning fikricha, Husanov odatiy moslashuv bosqichidan o‘tib bo‘lgan va endi bu mehnat samarasi maydonda ko‘rinayapti. Aguero uni kuchli, tezkor va yakkakurashlarda ishonchli futbolchi sifatida ta’riflagani haqida xabar qilinmoqda. Ushbu baho “Siti”da Husanovga nisbatan uzoq muddatli ishonch shakllanayotgani haqidagi qarashlarni yanada mustahkamlaydi.
“Bu yil u juda yaxshi o‘yinlar o‘tkazyapti. Husanov odatiy moslashuv jarayonidan o‘tdi va endi buning natijalarini ko‘ryapmiz.
Abduqojir kuchli, juda tezkor va yakka kurashlarda g‘alaba qozonadi. Hali yoshligini inobatga olsak, demak “Manchester Siti”da ko‘p yillar o‘ynaydigan ajoyib himoyachi borligi ayon bo‘ladi”, - dedi Aguero.
Bu yerda eng muhim jihat — Husanovning faqat bir pozitsiyaga “qamalib” qolmayotgani. U markazda ham, zarurat paytida o‘ng qanot himoyasida ham o‘ynab, universalligi bilan e’tibor tortmoqda. Zamonaviy futbolda bu katta plyus: murabbiy uchun bunday futbolchi — yarim muammoni hal qilgan kadr.
Albatta, “Siti”da raqobat oson emas. Jarohatdan qaytayotgan himoyachilar, yangi transferlar va yosh iqtidorlar bor. Lekin aynan shunday muhitda o‘ziga joy olish — futbolchining haqiqiy darajasini ko‘rsatadi. Aguero ham shu nuqtaga urg‘u bergan: katta sovrinlar uchun kurashadigan jamoada har bir pozitsiyada bir nechta ishonchli variant bo‘lishi shart.
Husanovning yo‘li ham e’tiborga loyiq: u faoliyatini Belarusning “Energetik-BGU” klubida boshlab, qisqa vaqt ichida Yevropa orqali Angliya grandlaridan birigacha yetib keldi. Bu — shunchaki transfer tarixi emas, balki intizom, o‘sish va to‘g‘ri qadamlar samarasi.
Qisqasi, Serxio Agueroning ochiq qo‘llab-quvvatlashi bekorga emas. Agar Husanov shu tempda davom etsa, “Manchester Siti” yangi avlod himoya chizig‘ining asosiy ustunini allaqachon topib bo‘lgan bo‘lishi mumkin. Bunday e’tirof esa nafaqat futbolchining o‘ziga, balki o‘zbek futboli uchun ham juda katta signal.
“Zamin”ni Telegramʻda oʻqing!
