Spalletti muxlislardan madad so‘radi yoxud "Yuventus"ga mo‘jiza kerak

Turinning “Yuventus” klubi uchun bugungi Chempionlar ligasi kechasi oddiy o‘yin emas — haqiqiy sinov, hatto futbolcha aytganda, “tirik qolish bahsi ”. Pley-off javob bahsi oldidan bosh murabbiy Luchano Spalletti jamoa qiyin ahvolda ekanini tan olib, muxlislardan kuchli qo‘llab-quvvatlash so‘radi. Bu haqda klub rasmiy manbalari va bir qator sport OAV xabar qildi.

Spallettining ta’kidlashicha, “Yuventus”ga bugun faqat taktika yoki mahorat emas, tribunalarning quvvati ham juda kerak. Chunki birinchi bahsda Turkiyaning “Galatasaroy” jamoasi 5:2 hisobida g‘alaba qozonib, turinliklarni juda og‘ir vaziyatga solib qo‘ygan. Demak, endilikda “keksa sinora” keyingi bosqichga chiqish uchun deyarli mo‘jiza yaratishiga to‘g‘ri keladi.

— Muxlislarimizning qo‘llab-quvvatlashini kutamiz. “Yuventus” hozir qiyin ahvolda. Bizga tribunalar yordami kerak. Birlashgan kuch sifatida harakat qilishimiz va keyingi bosqichga chiqishimiz kerak. Umid qilamanki, biz buning uddasidan chiqa olamiz, — degan mazmunda fikr bildirdi Spalletti.

Mutaxassisning bu gaplarida ham chaqiriq, ham ogohlantirish bor. Chunki “Yuventus” birinchi o‘yinda himoyada juda ko‘p muammo ko‘rsatdi, raqib esa har bir bo‘shliqdan sovuqqonlik bilan foydalandi. Endi Turinda jamoa nafaqat gol urishi, balki orqada ham tartibni tiklashi shart.

Shuning uchun bugungi bahsda muxlislar roli yanada katta bo‘ladi. “Alyans” stadionidagi bosim, energiya va ovoz “Yuve” uchun qo‘shimcha kuchga aylanishi mumkin. Lekin raqamlar shunday deydi: 2:5dan qaytish — bu shunchaki g‘alaba emas, katta kambek talab qiladi.

Qisqasi, bugun Turindagi uchrashuvda hamma narsa bor: bosim, umid, xavf va katta intriga. “Yuventus”ga birlashish kerak, “Galatasaroy”ga esa ustunlikni saqlash. Futbolda ba’zan bir kecha butun mavsum taqdirini hal qiladi — bugungi tun aynan shunday toifadan.