Yaqin Sharqdagi keskin siyosiy-harbiy vaziyat endi sport maydoniga ham soya tashlamoqda. Ispaniyaning Marca nashri tarqatgan ma’lumotlarga ko‘ra, Eron milliy terma jamoasi mamlakatga nisbatan AQSH siyosati va xavfsizlik bilan bog‘liq vaziyat sabab 2026 yilgi futbol bo‘yicha jahon chempionatida ishtirok etmaslik variantini ko‘rib chiqishi mumkin. Bu hozircha rasmiy qaror emas, ammo dunyo futboli uchun jiddiy xavotirli signal sifatida baholanmoqda. FIFA ham Eron atrofidagi vaziyatni diqqat bilan kuzatayotganini aytdi.
Ma’lumki, 28 fevral kuni ertalab Isroil Eronga dastlabki zarbani berdi. Oradan ko‘p o‘tmay AQSH prezidenti Donald Tramp yirik harbiy operatsiya boshlanganini ma’lum qildi. Shundan keyin Eron ham javob tariqasida Isroil va Yaqin Sharqdagi AQSH harbiy obyektlari yo‘nalishiga raketa zarbalari yo‘lladi. Aynan mana shu keskinlik Eron termasining mundialdagi ishtirokiga doir savollarni yanada kuchaytirdi.
Eron terma jamoasi sport jihatidan esa mundialga munosib yo‘l bilan chiqqan edi. Jamoa Osiyo mintaqasi saralash bosqichida o‘z guruhida birinchi o‘rinni egallab, 2026 yilgi jahon chempionati yo‘llanmasini qo‘lga kiritgan. Ya’ni, futbol tomondan qaralsa, “forslar” turnirda qatnashish huquqini halol va ishonchli tarzda ta’minlab bo‘lgan.
Qur’a natijalariga ko‘ra, Eron G guruhidan joy olgan. Ushbu kvartetda Belgiya, Misr va Yangi Zelandiya ham bor. Reuters va FIFAga yaqin manbalar xabariga ko‘ra, Eronning guruh bosqichidagi bahslari AQSH va Kanadada o‘tishi kerak: ikki uchrashuv Los-Anjelesda, yana biri Sietlda rejalashtirilgan. Demak, masala faqat futbol emas — safar, xavfsizlik, kirish-chiqish va siyosiy qarorlar bilan ham bevosita bog‘liq.
Shu bois hozir asosiy savol bitta: Eronning ehtimoliy ishtirokdan voz kechishi o‘z siyosiy qarori bo‘ladimi yoki vaziyat FIFA va mezbon davlatlar darajasida boshqacha yechim talab qiladimi? Reuters xabariga ko‘ra, FIFA hozircha batafsil izoh berishga shoshilmayapti, ammo tashkilot mezbon davlatlar bilan muloqotda ekani va asosiy ustuvor masala xavfsizlik ekanini bildirgan.
Qisqasi, Eronning mundialda qatnashish masalasi hozircha rasman yopilgan emas. Ammo mojaro chuqurlashsa, futbol tarixidagi eng katta turnirlardan biriga siyosat va xavfsizlik omillari jiddiy aralashishi mumkin. Bu esa nafaqat Eron, balki butun jahon chempionati atrofidagi rejalarga ta’sir qilishi ehtimoldan xoli emas.
“Zamin”ni Telegramʻda oʻqing!
