Italiya A Seriyasining navbatdagi turida "Yuventus" o'z maydonida autsayder "Piza" jamoasini qabul qildi. Uchrashuv kutilganidek turinliklarning to'liq ustunligi ostida o'tdi va yakunda 4 0 hisobidagi yirik g'alaba bilan yakunlandi.
O'yinning birinchi bo'limida mehmonlar qarshilik ko'rsatishga uringan bo'lsa ham, ikkinchi bo'limda "Yuventus" futbolchilari o'z sinfini namoyish etdi. 54 daqiqada Andrea Kambyazo hisobni ochgan bo'lsa, oradan ko'p o'tmay Keffren Tyuram Ulyen farqni ikkitaga yetkazdi. Uchrashuvning 75 daqiqasida Kenan Yildiz o'z nomini tabloga yozdirib qo'ydi. O'yin yakunlanishi arafasida esa Jeremi Boga raqib darvozasiga to'rtinchi golni kiritib, yakuniy nuqtani qo'ydi.
Statistik ko'rsatkichlar ham mezbonlarning yaqqol ustunligini ko'rsatib turibdi. "Yuventus" raqib darvozasi tomon 23 marta zarba yo'lladi, shulardan 7 tasi aniq chiqdi. To'p nazorati bo'yicha ham turinliklar 63 foiz ko'rsatkich bilan yaqqol peshqadamlik qildi. "Piza" esa atigi 5 marta zarba berishga muvaffaq bo'ldi xolos.
Ushbu g'alabadan so'ng "Yuventus" 28 ta o'yinda 50 ochko jamg'arib, turnir jadvalida 6 o'ringa joylashdi. Jamoaning gollar nisbati ham ijobiy tomonga o'zgarib, 22 tani tashkil etmoqda. Aksincha, "Piza" 15 ochko bilan jadvalning eng so'nggi 19 o'rnida qolib, xavfli zonadan chiqib keta olmayapti.
“Zamin”ni Telegramʻda oʻqing!
