Yevropa futbolining eng nufuzli turniri sanalmish Chempionlar ligasida chorakfinal bosqichiga chiqqan jamoalarning moliyaviy natijalari e’lon qilindi. Turnir nafaqat sportiy jihatdan, balki iqtisodiy tarafdan ham klublar uchun katta imkoniyat eshiklarini ochmoqda.
Joriy mavsumdagi daromadlar reytingida Myunxenning «Bavariya» klubi yetakchilikni qo‘lga kiritdi. Nemis grandi musobaqadagi ishtirokidan 112,3 million yevro ishlab topib, raqiblaridan oldinga chiqdi.
Ikkinchi pog‘onadan Londonning «Arsenal» jamoasi o‘rin olgan bo‘lib, “kanonirlar” hisobida 109,7 million yevro mavjud. Ularga juda yaqin natija qayd etgan «Liverpul» esa 109,5 million yevro bilan kuchli uchlikni yakunlab berdi.
Shuningdek, Fransiyaning «PSJ» klubi 105,9 million yevro daromad bilan to‘rtinchi o‘rinni egallagan. Madridning «Real» jamoasi 102,6 million yevro bilan beshinchi pog‘onadan joy olgan bo‘lsa, «Barselona» 100,3 million yevro natija bilan oltinchi o‘rinni band etdi.
Qolgan ishtirokchilar orasida «Atletiko» 89,2 million yevro bilan yettinchi bo‘lsa, Portugaliyaning «Sporting» klubi 79,6 million yevro bilan ro‘yxatni yakunlab berdi.
Bu raqamlardan ko‘rinib turibdiki, Chempionlar ligasi faqat g‘alabalar va trofeylar emas, balki katta moliyaviy bonuslar manbai ham hisoblanadi. Ayniqsa, keyingi bosqichlarga chiqqan sari klublar byudjeti yanada mustahkamlanib bormoqda.
Eslatib o‘tamiz, ushbu mavsumning hal qiluvchi final bahsi 2026 yil 30 may kuni Budapesht shahridagi «Pushkash Arena» stadionida bo‘lib o‘tadi. Muxlislar esa nafaqat chempionni, balki eng katta daromad qaysi jamoaga nasib etishini ham katta qiziqish bilan kutishmoqda.
“Zamin”ni Telegramʻda oʻqing!
