O‘zbekistonda sport sohasini rivojlantirish va moliyalashtirish tizimi yangi bosqichga ko‘tarildi. Prezidentning 2026 yil 24 martda qabul qilgan PQ–107-sonli qarori sport sohasi uchun zamonaviy moliyaviy mexanizmlarni joriy etish va tadbirkorlik subyektlarini keng jalb qilish chora-tadbirlarini belgiladi. Bu o‘zgarishlar sport sohasida investitsiyalarni oshirish, ijtimoiy sheriklikni kuchaytirish va umumiy samaradorlikni yuksaltirishga qaratilgan.
Qarorga ko‘ra, Sport vazirligi huzurida Sport sohasida tashabbuslarni qo‘llab-quvvatlash jamg‘armasi tashkil etiladi. Mazkur jamg‘arma orqali yangi loyihalar moliyalashtiriladi va amaliyotda qo‘llab-quvvatlanadi. Shuningdek, 2026 yil 1 apreldan boshlab sport federatsiyalari va uyushmalarning yillik xarajatlarining kamida 20 foizi miqdoridagi homiylik mablag‘i kiritgan tadbirkorlar ularning ijro organlariga jalb etiladi.
Professional futbol klublari faoliyatida ham yangi amaliyot joriy qilinadi: yillik xarajatlarning kamida 20 foizi miqdoridagi homiylik mablag‘ini ta’minlagan tadbirkor yoki tadbirkorlar guruhi klubni ishonchli boshqaruvga olish huquqiga ega bo‘ladi. Bu o‘z navbatida klublarning moliyaviy barqarorligini ta’minlaydi va boshqaruv samaradorligini kuchaytiradi.
Bundan tashqari, 2026 yil 1 apreldan 2029 yil 1 aprelgacha Superliga va Proligada ishtirok etuvchi futbolchilar jismoniy shaxslardan olinadigan daromad solig‘i va ijtimoiy soliq stavkasida yengillikka ega bo‘ladi. Bu o‘zgarishlar xususiy sektorni keng jalb qilish, investitsiyalarni oshirish va futbol klublarining raqobatbardoshligini mustahkamlashga xizmat qiladi.
Yangi moliyalashtirish va homiylik tizimi sport sohasini qo‘llab-quvvatlash va jahon standartlariga mos ravishda rivojlantirishda muhim qadam bo‘lib, muxlislar va investorlar uchun katta imkoniyatlar ochmoqda.
“Zamin”ni Telegramʻda oʻqing!
