O‘zbekiston milliy terma jamoasi futbolchisi Otabek Shukurov FIFA Series doirasida Gabonga qarshi (3:1) bo‘lib o‘tgan o‘rtoqlik uchrashuvidan so‘ng o‘z fikrlarini bayon qildi. Uning so‘zlariga ko‘ra, jamoa o‘yinni yuqori saviyada olib borishda hamon yetishmovchiliklar borligiga qaramay, asosiy eʼtibor g‘alabaga qaratilgan.
— Yaxshi o‘yin o‘tkazdik deb ayta olmayman. Ammo qoniqarli tomonimiz shundaki, g‘alaba qozondik. Keyingi uchrashuvga aniq tayyorlanib, maydonda munosib harakat qilishga harakat qilamiz. Milliy terma jamoa ancha vaqtdan so‘ng yig‘ildi, raqib jamoaning darajasi ham sezilarli taʼsir ko‘rsatdi, — dedi Shukurov.
Jurnalistning savoliga javoban, Shukurov Gabon jamoasining asosiy ustunliklarini shunday taʼrifladi:
— Afrika jamoalari jismoniy jihatdan yaxshi tayyor va ko‘proq noanʼanaviy uslubda o‘ynaydi. Shu bois maydonda biroz qiyinchilik yuzaga keldi. Takror aytaman, biz o‘yinni shunchalik yuqori darajada olib borolmadik.
Shukurov jamoaga yetishmaydigan jihatlar haqida ham fikr bildirdi:
— Har bir futbolchining jamoadagi o‘rni bor va nimadir yetishmadi deya olmayman. Jarohatdagi futbolchilar ko‘pligi sababli baʼzi o‘yinchilar amaliyotdan chetda qoldi. Erondagi vaziyat ham o‘z taʼsirini ko‘rsatdi. Bular ham mashg‘ulotlarda eʼtiborga olinmoqda va asta-sekin yaxshilanish ko‘zga tashlanadi.
Uchrashuvning 17–18-daqiqalarida Fabio Kannavaro futbolchilarni oldiga chaqirib, ko‘rsatmalar bergani haqida Shukurov shunday dedi:
— U mashg‘ulotlarda bajarilgan ishlar maydonda takrorlanmayotganini taʼkidladi. Oston O‘runov noto‘g‘ri pressingga chiqayotganini tushuntirdi. Hamma birgalikda pressingga chiqishda qiyinchilikka duch kelmoqda. O‘yindan oldin murabbiylar ishlab chiqqan rejalarni maydonda bajara olmadik: pressingda ham, pressingdan chiqishda ham. Shu jihatlar bo‘yicha ko‘rsatmalar berildi. Birinchi taym juda ham og‘ir o‘tdi. Ikkinchi taymda esa harakatlarimizni yaxshilashga harakat qildik. Kelasi uchrashuvni yana-da yaxshi tashkil qilishga harakat qilamiz, — dedi Otabek Shukurov.
Qisqasi, Shukurovning fikrlaridan shu natija chiqadiki, u nafaqat jamoaviy g‘alabani maqsad qiladi, balki har bir harakati va maydondagi masʼuliyatini yana-da takomillashtirishga intiladi. Muxlislar uchun esa uning maydondagi harakatlari va izchilligi qiziqarli bo‘ladi.
“Zamin”ni Telegramʻda oʻqing!
