Italiya senati vitse-prezidenti Lichiya Ronsulli milliy terma jamoaning Jahon chempionati–2026 yo‘llanmasidan qolishini “milliy sharmandalik” deb baholadi va mamlakat futbol boshqaruvini isteʼfoga chaqirdi.
Maʼlum qilinishicha, Italiya terma jamoasi saralashning hal qiluvchi bahsida Bosniya va Gersegovinaga qarshi penalti seriyasida imkoniyatni boy berib (1:1, pen. 1:4) ketma-ket uchinchi bor Jahon chempionatidan tashqarida qoldi. Bu natija nafaqat muxlislarni, balki butun futbol jamoasini hayratda qoldirdi.
Ronsulli taʼkidlashicha, “Italiya uchinchi bor mundialga chiqolmayapti. Gattuzodek buyuk rahbar va “adzurri”ning g‘ayrat-quvvatiga qaramay, natija shunday bo‘ldi. Biz dunyoning eng muhim turnirini 16 yil davomida o‘tkazib kelyapmiz. Bu misli ko‘rilmagan milliy fojia! Butun futbol tizimini tubdan isloh qilish zarur. Agar Italiya futbol federatsiyasi (FIGC) rahbarlari ozgina ham iftixor his qilsa, hozir isteʼfoga chiqish vaqti keldi”.
Shuningdek, senator federatsiya rahbari Gabriele Gravinaga alohida murojaat qildi: “Gravina, bunday halokatdan so‘ng sizda faqat bitta yo‘l qoldi — zudlik bilan isteʼfoga chiqish! Yakun! Italiya futboli bundan ham yaxshiroq natijalarga loyiq”.
Eslatib o‘tamiz, chorak asr avval, Italiya to‘rt karra Jahon chempionlari sifatida so‘nggi bor 2014 yilda final bosqichida qatnashgan. Shundan beri Italiya terma jamoasi yirik turnirlar saralashida muvaffaqiyatsizlikka uchramoqda va bu natija nafaqat faxrni, balki milliy fubol obro‘sini ham sinovdan o‘tkazmoqda.
“Zamin”ni Telegramʻda oʻqing!
