Jahon futboli muxlislari intiqlik bilan kutayotgan JCH-2026 final uchrashuvi atrofida yana bir muhim yangilik paydo bo‘ldi. FIFA AQSHdagi mashhur “MetLife Stadium” arenasida bo‘lib o‘tadigan hal qiluvchi bahs uchun chiptalar narxini yana-da oshirdi.
48 ta ishtirokchi jamoa tarkibi aniqlashtirilgandan so‘ng taqdim etilgan yangi tariflarga ko‘ra, final o‘yini uchun eng qimmat chipta narxi 10 990 dollar etib belgilandi. Bu avvalgi 8 680 dollarlik ko‘rsatkichga nisbatan qariyb 26,6 foizga yuqori degani.
Qolgan toifalarda ham jiddiy o‘sish kuzatildi. Masalan, ikkinchi kategoriya chiptalari 7 380 dollargacha ko‘tarildi (avval 5 575 dollar), uchinchi toifa esa 5 785 dollar etib belgilandi (avval 4 185 dollar). Bu esa mos ravishda 32,4 va 38,2 foizlik oshishni anglatadi.
Manbalarga ko‘ra, FIFA bu safar zamonaviy dinamik narx belgilash tizimini joriy etgan. Yaʼni chipta bahosi talab darajasi va qolgan o‘rinlar soniga qarab doimiy ravishda o‘zgarib boradi. Bu esa ayniqsa finalga qiziqish yuqori bo‘lgan paytda narxlarni yana-da ko‘tarishi mumkin.
Eslatib o‘tamiz, JCH-2026 turniri AQSHning 11 shahri, Meksikaning 3 shahri va Kanadaning 2 shahrida o‘tkaziladi. Shu sababli musobaqa tarixdagi eng keng qamrovli chempionatlardan biri bo‘lishi kutilmoqda.
Shu bilan birga, chiptalar onlayn sotuvga chiqarilgan kuni ayrim texnik nosozliklar ham kuzatildi. Ko‘plab muxlislar rasmiy saytga kirishda qiyinchiliklarga duch kelib, navbatlar va uzilishlardan norozi bo‘lishdi.
Qisqasi, JCH-2026 nafaqat maydondagi kurash, balki tribunalar uchun ham “qimmat o‘yin”ga aylanmoqda. Endi savol bitta: bu narxlar muxlislarni to‘xtatadimi yoki final stadioni baribir to‘lib-toshadimi?
“Zamin”ni Telegramʻda oʻqing!
